不知不覺原來又到dse放榜前夕，然後距離我當年放榜都已經過咗4年，唸返轉頭自己當年做咗好多好愚蠢嘅決定，所以決定同大家分享一下，千祈唔好犯下我當年嘅錯誤…
首先講下背景，我當年放榜成績係比預期中差， best 5唔嗲唔吊嘅21分，勁嘅U入唔到，但又未至於讀唔到U嘅程度🤷🏻♀️作為一個文科人，所有有興趣嘅programme都係要23分以上先可以讀到。然後由於我數學勁差嘅關係，Engine呢d水泡科同我係完全無緣，所有強制計3科主科分嘅U我基本上都入唔到，只能揀計best 5嘅大學。
我第一個犯下嘅錯誤就係覺得「一定要讀大學，唔讀大學好核突」。唸返轉頭覺得自己真係好蠢，而家咩年代，點解仲會覺得唔讀大學＝失敗🤦🏻♀️ 如果當年嘅我肯撇低自尊心，揀retake嘅話，可能下年已經入咗自己想讀嘅大學。又或者我可以揀讀副學士，用另一條路入返自己想讀嘅科。可惜當時嘅我只係覺得如果我唔讀大學，一定會俾人笑，所以死都揀咗一科自己根本唔係好中意嘅科讀🙃其實大家不妨參考一下唔同院校提供嘅課程先再決定，譬如你對婚禮策劃有興趣嘅，就算你拎30分都好，我覺得你應該揀自己有興趣嘅科，而唔係因為個一科唔係咩神科或者直程唔係大學課程而唔揀佢。副學士又好，asso又好，職業課程又好，最重要嘅係你中唔中意，而家係你讀書但係唔係其他人讀，其他人嘅意見唔係咁重要。
呢個亦都係我犯嘅第二個錯，「揀咗一科雖然自己讀到但係冇興趣嘅科，而唔係一科自己真正有興趣而又想讀嘅科」。呢個其實講到爛，但係係真。唔好唸住「求其揀一科讀先啦可能之後會中意呢科呢」又或者「雖然我唔中意呢科，但係呢科出路好」，施主咁搞法你只會越讀越唔開心🌚當然我唔排除你最後真係中意咗呢科嘅，in that case恭喜你👏🏻但係好多時到最後你只會覺得做assignment 好辛苦，讀乜都唔入腦，好似chur住自己做一d根本唔中意嘅事。
第三個錯誤某程度上同第一第二個有關，就係「冇好好check清楚大學有咩科、有咩類型嘅前路可以揀」。由細到大我都唔知自己想做乜、讀乜。一直以嚟我都好羨慕有目標嘅人，因為有目標你先可以向住佢前往。然後我呢舊飯就係隨波逐流，臨中學畢業先唸大個想做咩、讀咩科好。結果就係我完全冇check清楚啱自己興趣嘅科目係乜，求其揀咗一科同自己興趣完全相反嘅科目讀🤦🏻♀️有時候唔洗話有d咩偉大志向，例如做醫生律師先叫有目標，你可以由一d自己享受嘅興趣開始入手。例如我一直以嚟唯一嘅興趣就係畫畫同睇卡通，以前嘅我覺得係香港係冇可能做到漫畫家或者從事藝術行業，尤其自己又唔係特別有藝術天份，畫畫只係一個興趣，所以從來都冇研究過相關嘅資料。直到讀大學讀到一半，我先發現原來呢個世界有個職業叫animator，exactly就係我有興趣又想做嘅嘢。如果當年我有好好研究，我就可以揀一d自己有興趣又同理想相關嘅科目🥲而唔係好似而家咁讀到好唔開心
最後一個錯就係「相信programme description 就係你將來會讀嘅嘢」。我可以話俾大家聽，如果你睇完jupas網上面個d咩description，又或者聽完talk之後對某一科好有興趣嘅話，先停低冷靜一下🙃上網搵多d資料、去下討論區問下有冇人可以分享一下個科實情係讀咩都好，總之唔好輕易相信佢哋寫出嚟嘅嘢😑 所有課程都會將自己包裝得好好，寫到天花龍鳳，但係到頭來你讀嘅嘢可能根本完全唔係你想像中一回事。題外話，認真建議大家check清楚你究竟揀緊d咩讀，例如千祈唔好覺得double degree＝勁嘢😀當年嘅我以為揀double degree好似好正，讀完出嚟有兩個degree wor，多人一個不知幾勁。我屌！原來係一個大伏！！首先double degree係忙到癲，然後你見其他科嘅人可以揀minor讀？sorry你冇份，你已經讀緊兩個degree，仲邊有時間minor？ 想當年天真嘅我根本唔知道咩係double degree就傻更更揀咗呢科，唸起都覺得自己蠢🥲
希望各位唔好犯下我當年嘅錯🤦🏻♀️當然我要強調以上只係我個人嘅感想，只供參考，唔係100％啱晒🙏🏻 又或者可能你會覺得我講個d係常識，正常人都知，但係冇法我當年就係咁蠢，所以我先想同fm分享一下，避免有人好似我咁stupid🥲最後祝各位dse成功，加油！
