做老師途徑/報PGDE問題+解答
香港大學
Hello😚見到各位DSE考生/有志投身教育界嘅同學仔對於做老師嘅途徑 報考PGDE上都有好多問題 希望以下嘅解答幫到大家啦～
（部份解答具有個人偏見，只供參考）
Q1：可以有咩途徑做老師？
A1：最直接嘅方法就係喺大學讀教育學士（BEd）學位，唔同院校（例如中大、港大、教大）都有提供BEd課程俾想做老師嘅畢業生，畢業之後會直接取得可以喺香港做學位教師（視乎個學位係中學定小學）嘅資格。
Q2：咩係PGDE？
A2：學位教師教育文憑，如果你大學修讀嘅學士學位同教育冇關係（例如你大學讀BA/BSc），但係你又想做老師，咁你就可以喺畢業之後去報考PGDE，取得做老師嘅資格。
PGDE有分Part-time同Full-time，分別以兼讀或者全職形式讀2年同1年。
Q3：邊度有得報PGDE？邊間畢業有分別？
A3：目前5間大學都有開辦PGDE（包括港大、中大、浸大、教大同MU），個人認為前4間分別不大，你可以一次過報曬5間，通常學校請人比較着重本科學位邊度畢業多過PGDE。不過MU PGDE可能就唔係太好😂（純粹個人聽返嚟）
Q4：如果我想做中文老師，我應該直接大學讀中文教育定係讀完BA再報PGDE？
A4：其實兩個都可以，我建議直接讀中文教育會比較穩陣，因為出到嚟已經即刻可以教書。但據我聽聞部份學校比較鍾意請老師BA+PGDE多過BA+BEd，因為感覺BA+PGDE學術根基比較紮實。
Q5：想做老師嘅話，讀教大定係三大好？
A5：如果想做小學或者幼稚園老師，個人認為教大比較好。尤其是幼稚園，因為好多幼稚園校長都係Edu畢業，所以傾向會請返Edu grad。
但如果你想做中學老師，非常建議揀返三大，因為絕少中學老師係教大畢業（even非三大都算少），學校請人都會優先請三大畢業。
Q6：PGDE係咪好難爭？
A6：我會話一定唔係容易，但又唔係坊間講到咁難。
要視乎你想出嚟教咩科，如果想教主科（例如中英數），因為學位比較多，競爭自然比較細。但想一畢業出嚟就入到full-time PGDE都唔係一件容易嘅事，事實上有唔少老師都要報幾次先考到。
但點解唔係話真係好難，因為如果你畢業出嚟可以先做1-2年TA，拎到少少教學經驗，甚至校長推薦信，你入到PT PGDE嘅機會其實非常高。
Q7：大學GPA要幾多先可以考到PGDE？
A7：好難一概而論，普遍起碼要3.0 up，但個人認為GPA唔係最影響收唔收你嘅因素，仲要視乎你面試表現、Prof覺得你有冇教學熱誠etc….
Q8：如果讀緊大學學位，已經清楚自己會報PGDE，可以點樣預備去提升自己入到嘅機會？
A8：要製造到自己好想做老師，好有教學熱誠咁俾個Prof睇，例如：有返學校開班教學嘅經驗、有reg過教育嘅course來讀、有義教經驗etc…..
如果大家有其他問題，歡迎留言～
我會盡量解答🙌🏻🙌🏻
