千祈唔好入中大AI
香港中文大學 人工智能：系統與科技
我係中大AIST 嘅學生，啱啱過完中大Open day, 想同大家分享下關於我讀呢一科嘅體會，勸各位打算揀中大AI嘅同學回頭是岸。
原因1: 職業前景
1a. 聽到身邊好多人都係俾老師或者屋企人水去讀，通常係聽得多人講AI係未來大趨勢/有好多工會被AI取代，或者聽過入啲大廠（Google, Facebook) 可以賺多過普通學歷打工仔一截。首先，香港係真係冇IT業，不妨去查下香港嘅startup, 10間有9間都係亂咁寫啲proposal然後呃政府funding, 然後唔夠2-3年就摺左間公司佢，呢啲公司會請好多AI / Machine Learning 嘅人，但係人工一定低，而且呢啲公司規模咁細，你可以expect 要做埋full stack software frontend backend.
1b. 而且，AI係一個研究嘅領域，前景唔清晰，研究成本高，啲公司搞AI係一個長線投資，請得人做AI/ML 基本上都係嗰啲科技龍頭公司。香港唔得，咁去外國搵食呢？喺歐美國家到入Google 呢啲大公司競爭大到冇可能入到，因為喺外國CS / AI / Engineering係啲好高分嘅科，入得去都係人中之龍，你唔會夠佢哋抽。
原因2: 你係唔會學到關於AI嘅嘢
2a. AI係一個新興嘅領域，好多而家industry 會用嘅嘢都係呢10年內提出，學校根本唔會教。
2b. AI 根本就唔應該係一個undergrad嘅科目，要真正理解AI背後嘅原理，起碼都要有幾年大學CS Math嘅底，所以外國啲大學通常都係master phd 先會學同研究 AI / Machine Learning, undergrad 讀嘅話完全唔紮實。香港有呢啲水泡科就係啲學店諗住坑你哋錢先開。就好似你唔會見到Undergrad 會有人major 量子力學咁，因為根本就唔係Undergrad可以駕馭嘅嘢。
2c. 其實中大AI同CS個課程係幾乎一樣。AI 只係焗你讀多幾個關於AI/ Machine Learning 嘅CS course。
原因 3: 中大冇Career Suport ，綁死你要讀上去
3a. 知道中大CSE Department 好鍾意show off 啲大學排名，又話勁過HKU UST，大家要知道大學排名唔反映教學質素/學生成就，中大CSE department 係重研究，輕教學，中大AI / CS 排名高係因為做得多Research, 啲教授個個都係論文機器，係咁出文又無心教書，所以教學質素差。
3b. 中大係幾乎0 career support, 其他u 嘅department / student body 都會搞下啲活動幫你接觸下啲career嘢，CU就乜都冇，自求多福。而且搵intern個機制出咗名差，返過幾份Intern, 啲HR都話請CU學生手續多又麻煩，HKU UST 好好多。
3c. 中大嘅AI Programme Syllabus差過晒其他U 嘅AI Programme，呼應返上一點，因為中大重研究，佢會逼你讀好多廢course, 真係實作嘅course 可能得Year 4 1-2個course, 其他好多都係理論course, 讀AI連電腦都唔使掂咁滯，我讀到year 3 都係對紙筆多過對電腦。
3d. 點解要教咁多理論course? 因為中大assume 左你哋入得嚟會讀埋上去master/phd, 所以佢哋唔會諗點解提升搵工競爭力。
原因4: U-life，人
4a. 相信大家想入中大可能係想要U-life 上莊chur玩, 但係engine 科係冇u-life，人哋year 1 會有1-2日dayoff, 你會有四日由9:30上到6:30, 你每日都會做緊功課溫緊書，結果GPA都係一般般。
4b. 點解會一般般？因為無論AI/CS/Engine，都會有一班同學係好熱愛電腦嘅人，佢哋視讀書為樂。有幾熱愛？ 我玩ocamp夜晚房game嗰陣，啲AI freshman 攞晒啲calc機ipad出嚟一齊做M2 Past paper。如果你係為前途而入嚟，你會好辛苦。
4c. 講下呢度啲人。CU AI 一年收around 30 個Local, cu 有啲少人嘅major 會成屆一齊玩，大家都會識大家。呢度大家只會當你係競爭對手。
如果你係以下呢幾種人，請你三思。
A. DSE理科有幾粒星但唔知讀咩嘅人：恭喜你！DSE辛苦啦！請你明白收分高嘅major 唔代表前途好，如果你想你嘅努力有成果，不妨去讀一啲專科/賺到錢嘅科 -> 醫療科 or business 如 Qfin
B. 好鍾意電腦又讀得嘅人：CS更稱心！選科彈性大。可以專攻任何嘢 -> CS
C. 想揀啲有前途嘅嘢：科技都有好多個subfield, 如果你真係對AI有興趣，去外國讀都唔錯，雖然而家外國tech 工嘅競爭都大過前幾年好多。
如果你已經入咗嚟：
如果你今年先year 1 year 2, 不妨諗下轉科，其實好多人都係入咗嚟先轉，唔使怕嘥咗時間。唔啱讀仲繼續讀上去仲嘥時間。
頭盔：我知一定會有人話唔應該expect 讀大學都要人哋餵啲知識俾你，應該自己搵嘢嚟學。我同意，但係呢一科本身個workload 已經好重，除非你好有熱誠，如果唔係你嘅大學生活會仲辛苦過你讀DSE嗰陣。呢篇文嘅主要目的係想大家知道入嚟嘅話要調整下心態。
唔講住，我要返去做功課。
