20210716 正式出櫃 多謝大叔的愛
更：
多謝大家嘅祝福！我地會維持落去❤️
希望各位以後喺街見到男男couple都可以友善對待 起碼唔會用奇異嘅眼光望住佢地🙏🏻😆
————————————
原文：
原本我都好似呀田咁 覺得自己只會中意大波妹
完全唔相信會中意男人
當呢一刻來臨 係完全唔知可以點做 好無助
第一次同男人拍拖既我非常之束手無策
亦好介意其他人眼光
一直以嚟都唔敢同身邊朋友公開呢段關係
更加唔敢同屋企人坦白
默默承受種種既壓力
喺呢套劇未紅之前
好多人一聽到Gay就會覺得好核突
兩個男人錫 攬埋一舊好嘔心
我聽過老母講咗句「男人老狗 成何體統」
我就知道佢唔會接受到自己個仔咁
真心多謝大叔的愛 多謝呀田呀牧KK
張男男戀愛呢件事完全消化咗 包裝得好好
令大家睇套劇嘅時候 唔會覺得好核突
主角既形象都好入屋
當我睇到老豆老母同身邊既朋友個個都追田牧
個個都田田 I love you ❤️
我就覺得呢次係一個好好既機會
所以我約咗男朋友嚟我屋企食飯
睇大結局+正式出櫃！
當我拎起咗同男朋友十指緊扣隻手
我係見到老豆同老母個樣係由驚恐😱
轉變成老懷安慰既慈祥☺️
我都好意外佢地竟然冇鬧我
反而仲問我 咁你係田田定呀牧？
你地邊個表白先？邊個係女朋友？
我知道有咁樣嘅結果
大叔的愛呢套劇幫得我唔少
其實我同男朋友已經一齊咗兩年
今日！我地正式結束咗呢段地下情
終於可以光明正大咁拖住隻手行出街
亦都可以隨時帶佢返去同我屋企人食飯
同時感謝男朋友呢兩年咁體諒我
真係好似KK咁 願意比時間我 等我
我知道現實中 好多gay couple唔會好似套戲
同埋我咁 咁好彩可以受到屋企人嘅祝福
但我知道香港人慢慢接受緊呢件事
你哋要堅持落去 希望你地都得到祝福！
