大家覺得突然被冷淡會係咩原因？
香港中文大學 綜合工商管理
勿repost
話說小弟喺交友App識咗一個內地男仔，講明先，對方唔係小粉紅。本身都抱住一個做朋友嘅心態去傾偈，慢慢傾之後發覺大家經歷都好相似。後來講理想型嘅時候，佢口中所有嘅特徵，我全部都中晒。再加上佢同我交換ig之後，偶爾會用疊字同我text message，仲有啲心心emoji。直到有一日，佢突然俾咗啲靚仔嘅片我睇，我覆佢話好靚仔，佢同我講佢呷醋，喺呢件事之前其實我都有少少動心，咁大家確認咗有少少鍾意對方之後，就決定先date幾次再決定。
喺初期大家都好主動搵對方，主動去了解對方會鍾意啲乜嘢，主動問對方做緊乜嘢，甚至對方都好想搵我FaceTime。而本來唔返內地嘅我都因為佢上咗兩次內地（兩次都係一齊住咗一晚酒店，冇做啲乜嘢）搵佢，我哋都講好咗喺內地嘅使費對方出，而喺香港嘅使費我出。喺第二次去內地搵佢之前都冇乜問題（so far佢冇同我講有啲乜嘢唔開心），直到去完第二次之後，對方回覆我嘅頻率越嚟越少，佢話因為要讀碩士要租房住，所以要睇房，問題係佢由朝睇到晚，甚至到瞓覺之前都冇諗過搵我，我搵佢FaceTime，佢都話唔得閒。
本來下星期一佢過嚟香港搵我玩，見佢嗰幾日覆得咁冷淡，我chok咗佢一句「不如你下星期一你唔好過嚟好啲？」佢就一句「好呀」，然後就打咗一大段嘢話性格唔啱，同埋遠距離，所以都係唔好一齊，但係就可以做朋友，而佢用交友app嘅初衷係結識朋友，之後就冇再搵我。
想問問大家幾個問題：
1. 佢所講嘅兩個原因係咪真係主因？定係純粹新鮮感減退咗？
2. 有冇可能佢識到比我更加好嘅第二個所以先攞個藉口打發我？
