課金係合理,內購就有問題？
開始之前解釋下點解po日常版
因為去後面我覺得唔係淨係講game
所以放喺日常版希望多啲人可以睇下
如果你覺得我講得唔好歡迎留言話畀我聽
呢個問題唔係玩開手機game未必明
呢一年嚟我好鍾意玩一啲要內購嘅遊戲
即係嗰啲付費手機game
好似我成日都講嘅魔女之泉系列
惡果之地, Despotism 3k, She see red
呢啲都係好出色嘅付費game
通常呢啲遊戲你喺應用商店安裝前
佢已經寫到明係要畀錢
有一種好似death coming同beholder
就係免費畀你玩第一章節之後再買完整版
睇下面留言一大堆人喺度鬧
話因為呢隻game唔係完全免費所以一星
呢樣嘢小弟真係睇唔透
上述呢一大堆獨立嘅作品
佢哋唔似好出名嗰啲課金手遊
有唔同嘅手法令到你係咁畀錢
佢哋冇所謂嘅碎片冇抽卡冇vip
你只要畀一筆一次性嘅費用就可以有曬所有嘢
(唔計音樂類型遊戲嘅歌 or dlc)
你玩完試玩版覺得唔好玩
畀個差評做一D批判係冇問題
但係因為人哋唔畀你免費玩之後嘅內容就一星
會唔會覺得自己太過cheap?
呢啲獨立遊戲其實都係人哋團隊
嘔心瀝血打造出嚟
好多時一隻普通的遊戲可能都係十五蚊
特價時段買仲會去到八蚊
幾十蚊買一套skin就係合理
15蚊買一隻完整嘅遊戲就覺得人哋呃錢
呢種心態唔覺得好奇怪咩？
以前大家都唔覺得app係應該收錢
免費係應份
尤其是youtube片已經係一個好明顯嘅例子
最出名嘅bomba 8蚊片事件
先唔好講政治立場
以bomba嗰陣時嘅剪輯同埋製作
八蚊一條片真係咁唔合理？
其實剪片拍攝全部都需要好多資源
你可能覺得靠廣告佢哋都營運到
(Brian:好多youtuber都係靠我哋搵食咋)🙄
但係嗰陣時嘅環境真係搵唔到食
去到而家開咗月費會員制大家覺得冇問題
因為大家知道youtuber都需要成本去拍片
唔係單純用部攝影機講幾句嘢就搞掂所有嘢
咁點解手機apps唔可以都咁諗呢？
所以呢個問題兜兜轉轉
一隻好嘅獨立遊戲甚至實用嘅apps
係咪咁唔值得返十幾蚊支持佢哋？
當然有經濟需要負擔唔到係合理
但係如果你係有盈餘
亦都對呢啲app有需要
希望大家慷慨解囊畀少少錢支持下
而家嘅應用市場太多一模一樣
淨係識得不停叫你哋課金又課金嘅game
又買成長禮包新手禮包升級禮包每月禮包
大部分遊戲嘅模式經常係一模一樣
只係外面嗰層皮唔同咗
如果繼續係咁
可能就冇曬其他有創意或者生命嘅遊戲
又或者更加實用嘅apps
