唔知道點樣可以揹起屋企嘅重擔
2021年3月3日 00:32
件事其實就係我媽咪上年發現我老豆出軌
有晒證據所以我老豆都認咗
但係佢就話佢唔會離開個小三
我媽咪接受唔到三人行但係又唔想離婚
可能係相處咗四十幾年一時之間好難完全唔依賴我老豆 或者仲有感情
但係佢就諗住同我同呀哥搬出去住
因為唔想見到我老豆每晚夜返就係因為去陪個小三
但係問題就嚟 我呀哥因為唔鐘意讀書
所以畢咗業之後讀唔到大學就去打工
而家返緊pt 人工唔多
我又仲有大概5年先大學畢業 如果冇突發嘢嘅話
雖然我讀緊嘅科將來唔會冇工返 起薪點亦都高
但係我就覺得如果我同媽咪同呀哥搬出嚟住都未必負擔得起貴租
更何況我媽咪自己都係返緊pt 佢又有類風濕關節炎
有陣時發作嘅時候隻手會又腫又痛 做家務都難更何況返工
所以我真係擔心我哋三個會養唔掂自己
其次就係我自己本身嘅人生目標係想結婚買樓同未來老公住
但係如果一畢業就要幫手俾錢租屋住
我真係唔知我幾多歲先可以儲到錢買樓
本來買樓已經難 而家佢哋有咁嘅plan就真係難上加難
加上我媽咪因為怕孤獨所以話將來想同我同我老公住
其實話一齊住唔係真係好大問題
但係諗深一層 我就覺得唔通我成世都要同屋企人一齊住？
有陣時我都想離開一下屋企人 想有啲私人空間
我唔想成世都黐住屋企人
就算到時候我媽咪老咗過咗身我都已經五六十歲😥
我知道我咁諗可能有啲自私 但係始終唔想成世都冇試過自己一個人住😞要一世同屋企人黐埋一齊咁
前排我見到我媽咪同啲姨姨講起將來嘅計劃
啲姨姨問佢遲啲住屋嗰方面嘅計劃係點
佢就話「等妹妹畢業之後靠佢份人工租屋住」
我睇到呢度真係好大壓力
因為我原本自己有自己嘅計劃
我計劃左一畢業就儲錢 儲到一段時間睇吓買唔買到樓
但係而家咁樣我嘅所有計劃都變晒
我都知道我有責任幫手承擔屋企嘅嘢
但係同時我都想有我自己嘅人生
我媽咪又唔想離婚 咁就冇得用佢個名申請公屋或者搞分戶 所以租屋係唯一一個方法
但係我都唔知可以租得幾耐
始終有一日我同阿哥都要結婚都要儲錢買樓
如果一直租屋我諗呢一世都冇機會買到樓
有時就覺得我嘅人生好似完全俾上一輩影響咗咁
