搭小巴遇到個疑似有精神病嘅司機
香港中文大學
我依家搭小巴仲有啲驚😭
話說件事係咁嘅，我上星期二晏晝6:20左右上咗㗎小巴。
我上車嗰陣係有個男仔同我上車嘅 當時車上面亦有一位女乘客。
我一上到車就發現個司機係我之前搭過佢車嘅司機
首先，同大家介紹吓個司機嘅情況。
呢個司機唔知點解好鍾意睇人車費因為架車係唔同路段有唔同嘅收費，跟住話：估到你喺邊度落車，你唔使嗌。佢會叫啲人唔好叫落車，話知道你邊度落喺邊度停。同埋佢都好鍾意自言自語。我啲屋企人都話個小巴司機疑似有精神病。
以上就係呢個司機嘅情況。而今次我上到車，我就發現個司機好嬲咁係咁重複話自己太好人，唔應該叫人落車，唔應該提佢地。仲話自己比一個阿伯鬧，自己唔會再咁好人啦。之後車上面原本個女乘客落車。佢仲繼續重複緊頭先啲野。途中佢揸揸吓突然仲揸到好快。我就嚟俾佢嚇死，於是我就全程捉實扶手。
跟住到我就嚟到站嘅時候，我就話落車啦。我原話係咁嘅：赤泥坪有落，唔該。
其實我就覺得呢句野都唔係冇禮貌。😢
但係個司機一聽到我講呢句嘢，就即刻好似發作咁，勁大聲好嬲咁話：你做咩要嗌落車？點解唔一上車話喺邊度落。又話佢真係太好人，應該直接唔比我落，直接車我去總站之類嘅嘢。
我當堂俾佢嚇到呆咗。其實我都有諗過直接話返佢轉頭，但係我真係好驚佢真係會好似佢咁個咁講直接車我去總站，唔俾我落。
不過好彩佢都係比我係個站落。個車門一打開，我就即刻衝出去。我真係唔想再留係個小巴度啦。
自從上個禮拜呢個事件之後，我就冇搭過小巴。可能係因為呢件事令到我對小巴產生左陰影。
大家搭小巴嗰陣有冇遇過呢啲情況？如果遇到大家會點做？
