想做保險嘅入一入來
香港城市大學
小妹前排係美國X邦A*A做左幾個月保險，前幾個月離左職，想係到比各位一啲求職建議。
1️⃣我極度唔建議大家入行，因為香港就來agent多過客，而且有數據顯示平均每個香港人就有兩張保單，基本上你好難再揾到客，就算有，啲客都會想揾做左幾年嘅agent，而唔係剛入職嘅你。
2️⃣工作要求好閪，佢需要你每個月跑夠一定嘅數先會出糧比你，如果一年內跑唔夠數，佢唔會再比你繼續做+要求你還返晒所有嘅人工同bonus比佢地。
每個月要比team fund, 即係會費，唔理你個個月開到幾多張單，甚至一張單都開唔到，你每個月都要比幾百至幾千蚊會費，佢地話呢啲係用來比team嘅郵寄費+雜費。
每星期有幾日都要開會，如果你不幸遲到，係要罰錢架😀
⚠️注意，以上嘅野，如果你唔主動問，你嘅leader係唔會主動同你講，要等你攞晒牌入埋職先會講⚠️
3️⃣唔誠實，首先佢地請人從來唔會開宗名義講話請「保險代理」，而係寫「財富管理顧問」、「財務策劃顧問」，甚至「移民顧問」、「升學顧問」等等，你地諗下點解會咁做？
第二，佢地會時不時搞所謂嘅移民講座、升學講座、船P、聚餐等等，目的就係想揾客簽單，我曾經參加過佢地某個活動，表面睇好似比緊有用資訊人地，實質係想完結後r客，個次我完全覺得成個活動充滿詐騙性質，對自己嘅工作再多添左偏見。
4️⃣實在太難揾錢，相信每人係猶豫緊入唔入職時，你嘅leader總會同你灌輸「一張單就賺十幾萬！」、「多勞多得」、「面皮唔值錢」、「三十幾歲就財自」呢啲message洗你腦氹你入職，到你真係入左職時，你會發現根本冇想像中咁易，你要時刻抱住呢個問題「人地憑咩揾你買？」(如果你係KOL就除外）有得㨂嘅話，你自己都會想揾個有幾十年經驗嘅agent, 唔洗怕變孤兒單。
當然，佢地都會話，你可以利用網絡揾客，但好對唔住，當你係ig, facebook 揾關鍵字，你會發現其實已經有好多同行，佢哋差不多個個都係買followers同like, 你唯有都照做，買followers買like, 但其實毫無意義，去到最後一樣都係冇乜客，一句講晒，agent係香港已經飽和曬。
5️⃣斷六親，第4️⃣點都有講到，你基本上好難開到單，所以好多人嘅第一張單都係揾親戚朋友買，如果你面皮簿，基本上可以講玩完，如果你親戚朋友肯幫，咁就恭喜你先，但唔好忘記，當所有親戚朋友幫晒你後，你仲可以揾到邊個？朋友嘅父母？sorry佢地可能已經有保單。親戚嘅朋友？sorry佢地可能唔敢信你。好多人揾晒親戚朋友後，一係就自己幫自己開單，一係就跑唔到數離職，最後所有親戚朋友嘅單變晒做孤兒單，所有親戚朋友都怕左你憎左你。
6️⃣價值觀唔健康，保險agent成日好乸中意講「幫人幫人」，但其實去過training都知，根本就係為sell野，佢地會set左啲數，跑夠幾多就有咩奬勵，然後大部分人就好似打左雞血咁。其實想揾多啲錢冇問題，有邊個唔想發達？但佢哋會用「幫人理財」、「幫人達到財富自由」、「幫人買個安心」去包裝自己嘅職業、美化自己嘅企圖，極度虛偽。
而且，training時佢哋會比個list你，要你將所有身邊識得嘅人名寫出來，分析你同佢開單嘅機率, 又會比份稿你，教你點sell親戚朋友，基本上佢哋default就係target親戚朋友，我真係冇見過任何生意一入來就係揾身邊人開單，佢地呢種營銷手法真係好唔健康。
7️⃣做到隻狗咁，唔好以為真係好輕鬆，你揾10個人，可能得5個有回覆，3個考慮簽單，最後1個成功簽單，但係呢個過程中你已經用左好多時間。
到你成功簽完，你可能想搞好關係，等佢介紹多啲客，你可能要陪佢睇醫生、搞手續、隨時佢send message問問題你要覆，節日時又要送下禮，基本上仲辛苦過打工，老闆都冇咁煩。
8️⃣冇尊嚴，男仔同人講做緊保險，啲人可能會覺得你讀唔成書先去做（雖然入行門檻提高左，但多年形成嘅偏見係好難消除），即使你賺好多錢，啲人仍然內心會call你「跑數狗」，你唔好諗住人地好似表面一樣咁尊敬你。
⚠️女仔做保險就大件事，啲人第一個想法一定係「賣床單」，就算你唔會做個啲嘢，佢哋都會攞呢個開玩笑，你聽到都會好唔舒服。如果你靚女啲嘅，更加有可能會比客人抽水，我有同事試過比人摸手仔，企街推銷時又比男人上下打量睇佢身材，好可怕。⚠️
講左咁多，希望想入保險界嘅朋友三思而行，今時今日香港嘅保險行業已經極度飽和，而且雖然話入行門檻提高左，多左大學生入行，但其實都洗唔甩佢哋呃呃氹氹嘅本質，基本上只有冇良心/屋企有錢嘅人先做得長，如果你兩個都唔係，建議你都係腳踏實地揾錢。
另外，如果你想買保險，建議直接揾保險公司買，因為當你買儲蓄保險，你每個月儲$3000，其實有$1000係落咗agent嘅袋，你諗吓你憑咩要比佢哋袋？如果唔識自己來，就揾真係做左好耐嘅agent, 點為之耐，起碼10年或以上，完。
