獨遊 藍地水塘
嘗試下啲新嘢 記錄低去一啲都算簡單嘅行山/郊遊地方 俾想去嘅大家參考下 (聽講郁動下身體會開心啲🙊) 今次揀去藍地水塘嘅原因只有3個: 夠短 夠簡單 同埋夠近

感想: 行完藍地水塘雖然冇乜行到高山嘅達成感 但呢個短路程可以俾到你喺日常生活忙裡偷閒嘅小小空間 有種鬆一口氣嘅感覺 單程如果就咁行嘅話其實半個鐘就行得完 加上9成9路都係石屎路 對於我呢啲極少行山嘅人嚟講都算易handle
過咗公路嗰段入到村之後就靜咗好多 完全可以enjoy大自然嘅聲音 但係如果假期行就應該會多人啲嘈啲 因為半個鐘路程換到呢個景絕對十分抵 加埋風吹動嘅流水聲 樹葉聲同雀仔叫聲 真係正到
喺富泰商場食完晏就出發 經過虎坑路 富泰燒烤樂園 沿住公路行一段時間之後就入咗條村 (唔係有塊牌寫住外人請勿進入嗰度!!) 村裡面啲路有啲難認 但只要跟住google map就冇問題 出到去見到一個泊咗好多車嘅空間就證明你行啱方向
然後就會見到指示牌 一路跟住指示牌嘅方向行 (注意: 呢段行人路維修緊 變咗用木板同竹搭出嚟嘅臨時步道) 就會遇到分叉路 行左邊嗰幾十級樓梯上去就會到達水塘


以上就係本人的小小遊記 歡迎大家俾任何意見 (第一次寫呢啲 唔知應該點寫)
P.S. comment有比較詳細嘅路線圖示