爸爸咁多年都原諒唔到自己
香港大學
「沒錢」真係會改變一個人嘅人生。記得好細個嘅時候爺爺因為長期病患入咗院，嗰時候爸爸啱啱買樓結婚生咗我，同時佢亦都係事業發展初期，正處於資金比較緊絀嘅時候。我爸爸出身係一個貧困家庭，爺爺係做小販嘅，住喺天台鐵皮屋。我爸爸係家中嘅獨子，雖然唔富有，但係爺爺都將畢生嘅積蓄俾咗爸爸作為首期同埋結婚。由於爺爺嫲嫲都係大陸偷渡落嚟，喺香港冇任何一個親戚，所以當爺爺病重嘅時候候完全搵唔到人可以投靠。爸爸嗰時候收入只係好普通，講緊係2002年嘅時候大概九千幾蚊一個月。當時候爺爺需要一隻好貴嘅藥，但係爸爸真係俾唔起亦都搵唔到人籌錢，最後爺爺都等唔到呢一款藥過身世。22年後嘅今日，所有嘢都唔同咗，爸爸有一個窮小子都變咗小康之家，係一個大企業嘅高層，年薪300萬。
我成長嘅過程係完全感受唔到自己係一個小康之家，除咗基本嘅補習，讀書，伙食，住屋唔需要我去憂愁，其他嘢佢都十分之從簡。細個有一段時間好憎爸爸，覺得佢好孤寒，因為佢乜都唔肯買俾我，佢唔肯買新手機，耳機，玩具。亦都經常掛喺嘴邊「我哋呢啲窮人無資格買呢啲咁嘅嘢嘅」，「有錢都唔係咁細㗎，留返啲錢唔知將來會唔會有啲緊急需」。咁多年來我哋都係去過四至五個家庭旅行，尤其是係大個咗之後基本上都係得我同家姐同埋媽媽3個人去，爸爸每次都係話工作好忙，慳啲錢，你哋玩得開心啲。
而家諗返轉頭，其實爸爸係咪咁多年來都原諒唔到自己當年嘅無能為力，所以用刻薄自己嘅方法去尋求一個同自己嘅和解。逐漸會明白爸爸唔係孤寒，補習讀書旅行嘅錢佢都肯俾，用喺我同家姐同媽媽身上嘅錢其實唔少。但係佢幾乎一分錢嘅享樂都冇仲喺自己身上。20年來經常都係開口埋口。「我呢啲咁嘅窮人xxxxxx」「我冇資格…..」作為兒子嘅，我係咪應該用啲唔知咩方法去同爸爸傾吓..但係我唔知點樣開口
