我生存左28年 今晚應該係我最想喊既一次 啱啱同女朋友食完飯返到屋企 見到家母仲未瞓 平時佢應該10點左右就瞓左 之後佢偷偷地咁叫左我入房傾密偈 話 你地有冇考慮結婚嗰啲 如果有 買樓首期嗰啲你地唔洗擔心 我手頭上有百幾萬可以比你 只要之後你地每個月比啲零用錢我就得 本身我呢幾個月已經好苦惱 前排炒股輸左7成倉 唔知點嘔舊首期出黎 身上流動資金連1萬都冇 個人好徬徨 唔知點好 亦都唔敢同另一半&屋企人講 當家母咁同我講時 嗰一刻覺得 原來我唔係孤軍作戰 我可以依靠下屋企 本身由細到大我同屋企人既關係都比較疏 返到屋企都係hi bye 瞓嗰啲 甚至有時全日都唔會同屋企人講一句野 同埋本身我自己都比較獨立 有咩問題都係自己解決自己孭 就算發生咩事都唔會同屋企人講 唯一一次要勞煩到屋企人既係撞左車斷左骨醫院要打比我屋企人 所以基本上我同我屋企人完全係0 frd 0交流 但估唔到到最後係背後守住我既 係自己屋企人