屋企要我幫手供樓
香港中文大學
長文慎入
小弟上年大學畢業，屋企得我一個仔，我爸媽一直冇儲錢退休，依家仲有筆債未還清，近排佢哋話還晒啲債就儲錢買樓，要我幫佢哋一個月供10-15k, 到時唔洗我俾家用，我老竇就另外俾20k, aim 10年供完。
我問佢哋點解一定要買樓，佢哋話如果買唔到樓，之後佢哋冇工作能力都係要我幫佢哋租樓，所以計返一定係買樓平啲。
我同佢哋解釋冇乜可能，同佢哋計利息同壓力測試，話比佢知如果要供3萬一個月就要差唔多一倍人工，佢哋話第時落我個名借，再問親戚借錢。
同埋我老竇年紀都頗大，做緊藍領，一日返成十幾個鐘，如果要供樓即係未來十年都冇得做少啲，其實佢健康都開始出現問題，我唔想佢過多十年都仲返緊一日十幾個鐘。
另外因為工作原因我都prefer快啲出嚟住，但係如果要幫忙供樓嘅話，我應該未來十年都要一齊同佢哋住。
但係我點同佢哋解釋佢哋都情勒我，話養到我咁大都唔報答佢哋，想要個地方住都唔肯幫手，以前佢哋供養父母都係攞大半份糧出嚟。我俾緊半份糧出嚟做家用，已經覺得好吃力。如果真係買樓就係綁死我未來10年都要俾咁多。另外好似啱啱咁講，唔係想唔想嘅問題，係根本冇能力，但係佢哋似乎接受唔到。
多謝大家睇到呢度。有冇師姐師兄屋企有類似情況，你地會點處理。感謝🙏🏻
