19歲女仔結紥
Anonymous
結紥完快1年，想記錄下呢個決定。
唔打算生bb，但有性行為，我比較獨行獨斷，同屋企人輕輕提過我想結紥，爸爸冇意見，媽媽唔建議，男朋友話尊重我所有諗法。
一開始搵資料，香港嘅價錢太高且要私家，我負擔唔起，所以搵咗內地嘅。先係微信上面問啦，因為未夠20歲，所以要帶親屬上去簽名。咁好慶幸我有一個咩都支持我嘅爸爸肯陪我去，雖然我事先冇同佢講過，但係佢都肯幫我簽字😭
咁到醫院之後呢，醫生循例問一堆問題，做一堆檢查。見我咁細個，會重複重複問真的確定嗎？有很多不同的避孕方法，結紥是永久且不逆轉的…之類。俾我上去手術室之前，仲同做手術嘅醫生講，做活紥，即係用帶綁住就好。應該係驚我將來後悔，就算想生返，復原嘅機會都大d。但係我再同做手術嘅醫生溝通，話要剪斷輸卵管，百分百嘅絕育。
檢查方面，會照B超，掃X光，驗尿液。唔知係咪個天都唔想我做呢個手術，我朝早咩都冇食，中午1點忍唔住食咗個包，2點見完醫生，佢同我講要空腹6小時先可以開始手術。所以要等到夜晚7點先做到。
咁check曬之後，做埋入院手續，就等做手術，等到就換衫除鞋，入手術室。吸入麻醉氣體就會瞓著，醒返第一時間嘅反應係個肚好痛，咁畢竟俾人開咗一刀，痛都正常。仲要因為我冇生過bb，肚皮好緊，更加痛。痛到一d力都冇，完全郁唔到，入返病房，姑娘話前6個小時不能睡覺也不能睡枕頭，後面8個小時才可以睡枕頭。講真痛到癲，佢有俾尿道管，prefer我前6個鐘係可以排尿嘅，但係我痛到連小便都唔得。過咗6個鐘，姑娘就幫我將尿道管拔走，佢話因為d藥會整污糟底褲，問我有冇帶護墊，我冇帶只能30RMB買一個護理包。然後其實一直都冇瞓覺，到第二日醫生查房。
我冇攞假嘅，以為個手術好快，而且係微信問嘅時候，客服回我快嘅可以即日出院，發炎先要留院觀察。我甚至最初嘅設想係星期日上去星期日落返黎，咁夜晚7點先開始手術就已經唔得，諗住星期一就要走，因為我星期二必須返到香港。點知星期一，個巡房醫生話我有發炎，唔可以出院，要我再留一日。之後我仲要忍住劇痛，二樓門診醫生，七樓手術醫生，四樓檢查部一直輪流轉，都係唔俾我走，先焗住留多晚。
咁到星期二啦，個醫生終於俾我走，但係我都仲係痛到癲，其實根本行唔到路，諗返起真係唔知邊度黎嘅勇氣。結算嘅時候，要俾多9000RMB，計埋住院費手術費藥物之類。但其實我係微信問嘅時候，佢話1萬就ok…算，都係比香港平。咁total 2萬RMB就係結紥嘅費用。然後就痛並開心嘅咁返香港，係羅湖坐上80蚊嘅頭等MTR返屋企。返到去俾阿媽心痛嘅碎碎唸:「做咩咁衝動啊…唉唔做都做咗了，唔痛唔痛了…」
心得總結: 唔好唔攞假就去做，預返好時間，最好有1個星期嘅時間，真係好痛唔係講笑，唔住院都留時間俾自己休息。如果好似我咁，上去做結紥嘅話，佢俾你嘅數請再向上預多1萬，當然啦間間唔同，都要自己睇過評價，或者聽完身邊人意見先。然後一定一定一定要搵人陪你，唔理係邊個都好。因為我個case係未滿20歲嘛，我都有諗過如果我爸爸媽媽都唔肯，咁就出面搵個人幫我去寫只龜。但係！就算係你求其係街上面搵個人上去幫你簽名，都請你要確定肯定必定confirm佢會陪你返到香港！我未做之前諗住就算我得一個人都ok，做完之後，我太感激我爸爸陪我了。如果唔係外賣冇人攞，水都飲唔到，起都起唔到身。所以呢，唔建議好似我咁極端，20歲唔到就急著去攞苦受。可以嘅話，等到20歲嘅時候，自己簽字，搵男朋友或者閨蜜陪自己去就ok了。
再講講我自己點諗嘅，應該好多人會話咁後生做咩咁諗唔開，將來會後悔架…太衝動啦…之類。請鍵盤俠手下留情啦，我想po呢篇文記錄返，同埋俾dd參考俾有呢個諗法嘅女仔。因為我想做嘅時候，網上搵到嘅都係男生結紥，未生過bb結紥嘅女仔經驗少得可憐。
我對於未來嘅規劃，一直都冇擺過小朋友係裡面。可能源於我嘅家庭原因啦，雖然感受到爸爸媽媽充分嘅愛，屋企都係幸福嘅，但係各種現實嘅枷鎖會令我覺得，生小朋友，俾佢黎到呢個世界係痛苦嘅。我唔想小朋友一出世就要學呢樣學個樣。我唔想小朋友要係一個納米房裡面大個。我唔想小朋友嘅童年係冇爸爸媽媽陪，而係爺爺嫲嫲或者工人姐姐陪。想要嘅野爸爸媽媽唔俾買，係學校可能會俾人霸凌，再去受公開試嘅壓力，出黎大個做野，經歷各種失戀之後，結婚生仔退休…我唔想由我再帶黎一個咁嘅輪迴悲劇。我自問我冇能力俾到d咩俾小朋友。我更加驚，當我生完佢，盡我能力去比幸福佢嘅時候會聽到:「你有冇問過我，我想唔想黎到呢個世界啊？！」可能我見識嘅野都係太少，感受唔到呢個世界有幾美好，但係既然我都感受唔到呢個世界嘅快樂，又點樣帶快樂俾下一代呢？
我記得一出手術室嘅時候，我同醫生講，好痛啊，不過沒關係，就痛這麼一次了。醫生話，寶寶，生孩子是很快樂的。我笑笑就冇力講野了。我問過身邊朋友，有諗過想生小朋友嘅同我講，佢會當係養成遊戲玩。而我從來都唔鐘意挑戰自己嘅，且更加想俾自己逍遙快活d。若果日後有咩變動令我要生，都仲有試管嬰兒可以做，但我絕對唔希望會有個日到來。
