與其喺度埋怨,不如增值下自己啦
香港大學
成日見到Dcard有好多人話抽唔到卡友
咁啱近排有個追緊我嘅人,無啦啦鬧我
突然想打篇文發洩下
講我自己背景先
我應該算係中上樣,成績幾好,識運動識音樂
同身邊啲人關係好好,所以讀緊書嘅時候都算受歡迎
追我嘅、鍾意我嘅人都唔少
(唔想開樣,所以用卡友去證明下
我上年先開始玩Dcard,卡友起碼20個以上)
不過呢一啲嘢,除咗個樣之外,其他都唔係天生
如果更仔細咁講,個樣同身材都要好努力去保持
我一切擁有嘅嘢都係自己努力咁追求返嚟
甚至連我自己幽默嘅特點都係歲月磨出嚟
其實都唔止一次,追我嘅男仔失敗咗就唱我
話我收兵,其實我根本就冇收過佢嘅好處
佢仲話我現實,不過呢個我認㗎
我有條件,咁自然係會選擇我欣賞嘅男仔
就算性別調返轉都係一樣
點解咁多女仔追星,但係唔去追你?
因為你係普通人囉,因為你唔夠佢哋偶像好囉
不嬲呢樣野都好現實,加上鍾意係一種感覺
你冇我個鍾意嗰種特質,點追都唔會成功㗎啦
成日有人話點解我咁好都冇拖拍㗎
得兩個原因嘅啫
一係你唔夠好,一係你未遇到會欣賞你嘅人囉
但與其等後者出現
不如主動啲令自己變得更好先啦
雖然話唔係一定努力就可以成功
但係努力之後嘅成功率一定係極高囉
:我努力咗啦喎,咁點解仲係失敗呀
即係你努力錯方向囉
你可能係咁關心個女仔諗住冧到佢
其實人哋唔中意,就會覺得煩
可能人哋鍾意幽默嘅男仔?咁你咪去學下點講笑囉
鍾意肌肉男?咁咪去練囉
鍾意有錢人?咁你咪搵錢囉
努力係要用係啱嘅地方,唔係一味付出就得
最後追唔到就怪返個女仔眼角高😐
嗱,我唔係批鬥男仔,呢篇文性別調返轉都一樣
如果你哋有咩睇法嘅話,歡迎賜教
