［長文慎入-問意見🙇‍♂️］ 話說我五年前開始鍾意左個女仔，個女仔A一直同另一個男仔B斷斷續續咁藕斷絲連好多年。之後男仔B都同過其他女仔拍拖，女仔A亦同過其他男仔拍散拖，喺呢幾年嘅時間A同B都保持住好好嘅關係；而我同A嘅關係就係好好嘅朋友，喺佢心目中應該低B一級，我地返學放假都成日出雙入對，係老師同學都覺得我地有嘢咁。 去到差唔多兩年前，男仔B識左女仔C，佢地開始有啲嘢。慢慢A意識到C嘅存在，覺得威脅到佢喺B嘅地位，喺上年考完DSE之後就決心追B，雖然最後都分左手，但係仍然keep到好朋友嘅關係。後來C同B正式一齊左，A都接受呢個結果。但係一開始A同B拍拖我係完全唔知，佢兩個都有繼續分別約我，仲好似以前咁若無其事。係C私底下同我講我先知道，我個下唔單止O左，仲好似覺得比人背叛左咁。不過咁，出來都確認過關係，又唔怪得邊個嘅。 喺好快之後我就下定決心去外國讀書，希望都可以快啲忘記呢啲，但係原來去到邊到都唔會忘記到。我喺外國個陣A同B已經分左手，而A都會成日搵我傾計，但係就從來唔會講個啲議題，我都冇問。 一年過去左，因為疫情我返左香港，到下年年頭先會走，喺呢段時候多左好多同A相處嘅機會。到七月我決定的起心肝搵晚約佢講曬內心啲嘢出黎，因為唔想再錯失機會同失去先後悔。佢聽完之後好平靜咁冇點反應，佢淨係話佢唔覺得/冇諗過我會鍾意佢，一直只係覺得我地係最好嘅朋友，但係明明身邊啲人全部都問我係咪有野嘢。 跟住我冇同佢講一排嘢，到八月底有一晚佢主動打比我，想同我傾呢樣嘢。佢問我點解鍾意佢同幾時開始，跟住我慢慢和盤托出，佢都好冷靜咁聽，然後佢應該開始諗返起五年嘅點滴，知道我喺好多事情上對佢係超越左朋友會做嘅。佢就話佢從來冇諗過，但係依家諗返其實自己都唔識得分係鍾意我定當朋友，跟住話覺得其實都可能係，佢仲有concern嘅係唔知遲啲longd點維繫。大家都話如果開始就唔想散，想拍長拖，呢個共識係好嘅。但係佢最後就話想要多少少時間考慮，唔係想揼波鐘，不過真係要諗清楚。 喺呢個幾月我地相處都唔同左嘅，佢會秒回我會主動搵我，啲對話都曖昧左，見面都唔尷仲close左好多。不過我地就冇再特別提過呢個議題，佢講過話想要多少少時間。我都唔想chur佢唔想搞到去有壓力。 身邊啲朋友有幾個一直知道嘅，但係態度就好兩極：有人話100%得，因為佢唔係揀人而係揀想唔想拍；但係就有人話佢想再繼續拖住我呢隻兵，叫我同佢設限期，唔比答案就當拒絕。黎緊就係佢生日同我生日，我唔想喺呢兩日問，免得日後對生日有陰影。 其實我覺得佢今次係認真嘅，如果唔會同我傾咁多呢方面嘅取態；但係我都覺得唔可以無限期咁拖，我都好清楚，如果今次衰左，真係可以以後唔洗見，我都會盡可能切斷佢令自己忘記。 所以想問其實我可以點？有冇女仔可以話俾我聽佢諗緊咩，究竟有冇機會？同埋仲可以喺呢個階段做啲咩加分？🙏🙇‍♂️