前排連登同自己朋友圍內都好多關於賣咸相嘅女仔（俗稱電子雞）嘅討論，傾吓傾吓就發現有勁多唔同嘅女權＆社會科學概念湧現，本身唔係讀嗰啲科所以有啲難follow up。 不過我覺得其實唔洗搞到咁複雜，叫得佢哋做「電子雞」擺明就係鄙視佢哋賣咸相賺快錢嘅行為。香港地競爭激烈，由受精卵誕生之前嘅補品質素開始，到超聲波圖搶幼兒中心幼稚園學位，再鬥到由父母宗教母校＆財力決定校網嘅小學學位，然後隊冧大部分同學入到band 1英中range，再訓練多六年最後喺DSE奮勇殺敵嘅倖存者，先有機會入到比較好前途好錢途嘅大學學科。（個別可以跳出主流既定路線&家財萬貫者不在討論範圍內，不過正常家境想唔玩讀書遊戲而收入要追到賣咸相嘅話，所付出嘅代價＆要承擔嘅風險都有返咁上下） 然後電子雞喺鏡頭前面一剝，收入就已經遠超呢班大學生&大部分喺社會努力打拼人士嘅平均入息水平。如果任由呢種風氣持續擴大&合理化，以後啲父母&老師仲有咩理據要求新一代要努力讀書學習，社會又有咩理由去説服啲人從事需要付出大量腦力勞力嘅工種？ 雖則商業社會應該係要自由買賣，但係社會不嬲有既定機制去對付合法搵快錢嘅行為，好似妓女援交呢啲就係約定俗成唔係好見得光嘅行業，炒樓炒股就要承擔本金損失嘅風險。但係賣咸相因為新興關係，仲係低成本低風險但係高回報，如果真係比佢正名＆合理化，將會瓦解社會「努力&代價x回報」相對要成正比嘅根基。 所以個人認為同咩女權&仇女冇咩關係，當法律唔會制裁呢種行為嘅時候，永遠標籤曾經賣過咸相嘅女仔係「電子雞」，由民間主流意見繼續鄙視佢哋就係一個一箭三鵰嘅方法，去增加佢哋賺快錢成本到相對合理水平；阻嚇新人入行同埋維持社會崇尚知識、技能、努力＆冒險精神呢個價值觀。 有人會話賣咸相係人哋嘅自由，關我蛋治。但係一樣嘢正確與否就係睇有幾多人撐，如果任由電子雞風氣持續發揚光大，難保有一日社會會賦予賣咸相正當性甚至係必然性。你話我保守又好男權又好，我諗我唔會接受到個女喺鏡頭面前剝衫剝褲比一大班毒撚對住佢狂打飛機，然後如果我試圖阻止，道理反而喺個女度，我先係食古不化同唔啱嗰個。不過如果你覺得咁樣係ok冇問題嘅話，歡迎喺樓下留言，我想睇吓dcard呢邊嘅意見係點🤔