所以結論係，原來佢有老婆
匿名
前情提要
上回提要，我懷疑佢真係有老婆，所以堅持要佢去婚姻登記處申請一張冇結婚記錄證明書，佢應承咗，但一直拖延。一係就話疫情關係冇開門，一係就話自己冇時間，每日都hea我，冇去申請，但佢堅持話自己係單身嘅，要娶都唔會娶一個咁惡嘅老婆。
由嗰陣時開始，我已經對呢個人死咗心，只係我仲未有好實在嘅證據揸喺手，唔忍心就咁分手（我認我on9），而嗰個女人亦都冇再打俾我，所以我又同呢個仆街一齊多幾個月，但有提醒自己保持警惕。
直至12月30日，佢應承我31號晚陪我倒數，我即刻去買食材，諗住同佢煮晚餐倒數。結果，佢31號晚話part time唔請得假，亦趕唔切12點前閂舖。請問一間體育用品店會12點都仲開門？
當我自己喺屋企食完晚餐，倒完數，我就醒啦，知道自己發咗一年夢，真係要醒啦，知道自己唔可以再呃自己啦。無論呢個男人有冇老婆，佢嘅人品都有問題；無論佢愛唔愛佢老婆，佢一定唔係愛我。所以喺一月頭，我同佢講咗分手。
喺一月尾中時候，有人WhatsApp我，問我係咪2008年已經有老公仔女，仲走去搞人老公。我答我冇，我得23歲，點樣有老公，2016年點樣生咗個女。嗰個人話，佢收咗個女人order，個女人提供咗我呢啲假嘅資料，聲稱我爭佢錢，叫人問我收數，個女人目的係想搵人騷擾我。
我就搵返個仆街，叫佢處理返呢個問題。已經分咗手，我已經夠hurt，俾人呃咗一年幾，可唔可以唔好再騷擾我，俾我過新生活。結果，佢成個懦夫咁，消失咗。
去到一月尾，個仆街打電話嚟，話佢老婆叫我出嚟，我話已經分咗手拒絕咗，亦block咗佢。點知佢老婆用佢tg搵我，我亦同佢老婆講，我唔知佢有老婆，亦已經同佢分咗手，請佢唔好再騷擾我，亦send咗條link出嚟，證明佢老公之前已經上過高登厹list，但佢冇回覆我。之後開始每一日，都會收到十幾個133電話，但我都忍，我知道佢老婆好憎我，佢會做呢啲行為，我唔會怪佢老婆，只會怪呢個仆街。直至有一日，佢老婆唔知有心定無意，打打下133 ，用咗自己電話號碼打俾我。
其實一直都好想打電話俾佢老婆，同佢解釋清楚，呢個仆街先至係罪魁禍首，我哋兩個女人都係受害者，但因為佢用133 ，我冇機會call back。我見到呢個電話號碼，就打咗過去。結果呢個女人仍然係好相信佢老公，佢老公話我係大陸人，佢就鬧我大陸雞。佢老公話我係一個30幾歲嘅女人，佢就相信我已經結咗婚生咗仔。我同佢講，你老公呃咗我哋兩個，佢同我講佢冇結婚冇小朋友，而佢手上面亦都冇戴戒指，佢要呃我都冇辦法，所以我初初先會同佢一齊。
但佢老婆唔相信我，認為我一早知佢結咗婚，仲沮咒我哋兩個有愛滋。試問一個老婆又點會沮咒自己個老公有愛滋呢？老公有即係你都有啦。所以我覺得佢老婆情緒好激動，好癲，我同佢溝通唔到。成程電話，基本上我聽唔到幾多隻字，因為佢講嘢拆晒咪。所以我講完我要講嘅嘢，就收咗線，佢信又好，唔信都好，我只希望佢唔好再騷擾我。我亦希望佢不如慳返騷擾我嘅時間，去管實佢老公，唔好再比呢個仆街做壞個市，唔好再比呢個仆街出嚟遺禍人間，唔好再俾佢拎住公務員呢個光環，出嚟溝女食女。
嚟到三月尾啦，無論有133定係冇133 ，我仍然會收到佢哋兩公婆嘅電話。我真係覺得好困擾，你地兩個唔想放低呢件事，但係我想啊，我想快啲move on啊。我唔想每日都記起自己俾人呃咗咁耐，呃感情，呃身體，我唔開心嘅原因係俾人背叛，而唔係失戀。同佢一齊嘅呢一年，唔知係咪上天提醒緊我，所以我屋企好多病痛，好多分離，呢一切，通通都係呢個仆街搞出黎嘅。
前個星期，我有send訊息俾個仆街，叫佢做3件事。
1.寄返我隻手扼俾我
2.同我道歉
3.管好個老婆
佢覆我話：已經寄左，我轉頭再同你道歉！
但去到今日，我仍然一句道歉嘅說話都冇見過。反而，比我見到佢開始做YouTuber，我真係好嬲，點解一個人做咁多衰嘢，仲未得到佢嘅報應？點解仲可以喺度風流快活？佢有一條片講炒飯，我仲聽到佢個女把聲，聽完個心真係好唔舒服，有老婆已經夠晒衰，有埋個女都仲要出嚟呃女仔，越諗我真係越討厭佢。有一條片佢講香港top3仆街，見到入面其中一個女仔有男友都出嚟呃人，我又諗起佢。我真係想留言，點解你唔擺埋自己入條片入面呢？你同呢個女仆街有乜嘢分別呢？
考慮到我留言之後，可能又挑起佢老婆嘅情緒，又開始不停騷擾我，我卻步咗。
周X霖先生，如果你睇到呢個post，我希望你可以同我道歉。雖然你唔係乜嘢高職位嘅人，只係一個ACO，但如果你老婆繼續騷擾我，我會打去你部門日日騷擾返你，等你啲同事全部都知道你做嘅好事。
大家覺得我應該點做？其實想攞返個道歉係咪咁難呢？對付呢啲仆街，需唔需要擺佢資料上嚟警惕世人呢？定係我應該多一事不如少一事，息事寧人？
真係好苦惱，好困擾，點解會咁唔好彩遇到呢啲仆街？
