男朋友講完當我結婚對象之後我秒分手
6月1日 03:09
講返啲背景先 我今年21，男朋友同年，我同佢係返PT識嘅，嗰時Yr1做珍珠奶茶舖，差唔多次次返工佢都喺度，到差唔多辭職嘅時候問佢拎Ig，每日傾偈再出去食飯睇戲，過咗冇耐就喺埋一齊
喺埋一齊第一個禮拜，有一日食完飯之後佢就語重心長咁樣同我講佢屋企家庭環境好差，住赤柱公屋，老豆差落一身債又唔肯出去做嘢，成家靠阿媽做759加KFC嗰份糧。 之後因為屋企由細到大都冇愛加上中學俾人bully所以佢有抑鬱症，雖然已經好返啲唔使食藥但係未康復，跟住佢同我講驚拍拖累咗我，話趁依家感情仲未深厚，我要走嘅話佢唔怪我
我聽完之後完全冇嫌棄佢，因為我係真心鍾意佢，我同佢講我會比到你幸福（好似男女角色調轉咁添😂）之後拍拖果一年幾，佢為面成日都唔俾我請佢食飯，所以我成日都拉佢食平嘢之後AA，就算係記念日知道佢請都唔敢食貴野，佢問我想要啲咩禮物我都唔會要求過＄150嘅野，之後佢生日我會Book最好嘅酒店最好嘅餐廳，就係為咗佢過得開心，跟住我生日我就會同佢講就咁出去整個蛋糕食個飯就得，出去整蛋糕要三百幾四百我都會肉赤佢，所以整完蛋糕食生日晚餐我都堅持唔俾佢請，仲有知道佢有情緒病我就不停上網同埋睇書搵點樣同情緒病人相處，每次佢有唔開心我都會即刻陪喺佢隔離聽佢講嘢，亦都唔敢刺激佢，直到琴日我都好慶幸佢一年來都冇試過情緒病復發
去到今日夜晚，佢喺我屋企忽然間爆喊跟住衝出露台話好想自殺，話自己無用，我諗住佢係抑鬱症復發所以即刻攬實佢安慰佢，過咗10分鐘之後佢入房話佢已經決定當我係結婚對象，之後坦白原來無論係家境定係情緒病都係假，全部都係佢嘅考驗，原來佢係住赤柱但係唔係赤柱公屋，係私樓（唔怪得我從來都冇見過佢屋企人同埋去過佢屋企），屋企亦都唔憂食 唔憂著，跟住佢根本就冇俾人bully亦冇情緒病，全部都係佢對另一半嘅考驗，佢覺得過埋熱戀期經過呢啲考驗另一半都唔離開佢嘅話，就值得娶，仲話佢屋企人決定送第二間屋比佢住落佢名，叫我同佢一齊同居
佢坦白如果一刻，我叫佢即刻離開我屋企，呃佢話阿妹係hall有事返緊屋企（阿妹同我同房），之後signal 同佢講分手，我從來都唔介意佢情緒病，亦都唔介意佢窮，但係佢呃足我一年幾我真係頂唔順，我覺得佢雖然冇情緒病但有精神病！ 仲有考驗呢一樣嘢究竟係幾冇信任幾冇安全感先做得出，佢而家不停同我講對唔住🤢，我決定打埋呢篇文之後block埋佢電話 Ig sc signal wts Tg 同del相💩🤮
