男朋友媽媽：「你當呢度自己屋企啊！」

匿名

聽到果下其實好hurt，可能大家以為我做左啲好失禮既行為，但其實我只係去男朋友屋企果陣，坐左佢屋企張梳化上面... 到今日男朋友媽媽啲好難聽既說話都仲想我個腦度係咁響，但係真係想問下大家以後應該點面對佢媽媽或者點樣行落去... 中秋節果日上左男朋友屋企食飯，除左佢爸爸媽媽之外，仲有佢其他幾個親戚，因為係男朋友媽媽下廚，所以等緊食飯果陣就響廳度同佢啲表弟表妹玩switch，佢姨姨見我入屋之後就一路企響度，就讓左少少梳化位俾我坐。點知男朋友媽媽響廚房出黎見到，就大大聲喝我：「企起身！做咩啊你依家？當呢度自己屋企啊？外人坐番圓凳！」（圓凳即係大排檔果啲膠凳）我已經嚇到冇聲出，尊重起見都企左起身先，跟住佢繼續鬧：「黎到我地屋企都唔識主動幫手，一黎就響度玩，一啲貢獻都冇」後面其實仲有好多，但唔講落去喇，再講對眼又開始濕... 其實如果你真係想我幫你，只要你開聲我點會say no，點解要咁強調我係外人？你唔鍾意我坐梳化都唔洗喝我掛... 但係男朋友見到之後，佢完全冇幫我講任何一句說話... 第一個出黎幫我既，竟然係讓梳化俾我既姨姨... 鬧完之後，佢媽媽全晚無論係大家食飯、傾計定任何時候對住我都眼超超咁，大好中秋節團團圓圓搞到咁我都真係唔知可以點算，咁小事佢媽媽都已經鬧得咁狠，真係唔知以後可以點相處落去... 難受歸難受，就算到依家都仲係好hard feeling都想問下，有冇人可以話我知下一步應該點行？🤕