男朋友送咗個二手袋比我做情人節禮物
匿名
是咁的 男朋友大我8年 一向好唔識浪漫又冇乜儀式感
但一齊咗咁耐我都習慣晒 冇要求佢要比咩驚喜我了
呢大半年嚟差唔多節有大時大節呀生日呀，都係自己去買蛋糕、自己book餐廳、自己book酒店staycation
上年情人節佢直情唔記得咗，而我留意到佢每次經過log on都玩個按摩槍玩到唔捨得走就偷偷買咗比佢做情人節禮物，但佢乜都冇，雖然我內心係有少少失落，不過見佢收到我禮物好開心，所以我都冇話佢啲乜免得掃興
咁今年我又留意到佢好想玩Pokémon阿爾宙斯，又話想要部switch兩年都唔捨得買，所以我就特登買咗部switch比佢做禮物…..我再自己一早book定酒店staycation+buffet想同佢慶祝
點知…原來佢今年都係乜預備都冇，所以佢唔係幾好意思我洗咗幾千蚊，決定今年真係要買返同等價值嘅嘢比我做禮物
點知！！！！佢幾日後拎咗個二手chloe袋出嚟，話係送比我嘅情人節禮物….我當場呆咗！二手都算，仲要係有啲殘舊有啲污糟、有好明顯使用痕跡、袋內好多原子筆化妝品漬….仲要個面我用3張濕紙巾抹都仲係成張紙巾黑蚊蚊
本身我都唔出聲想當冇事發生收咗佢算，點知佢開始一輪嘴咁話都幾千蚊嫁唔平嫁，我送禮物比你你仲咁嘅樣，點解要咁在意二手姐、你咪當係自己孭耐咗孭舊咗囉，而家興古著呀，我同事都會買二手袋比女朋友、人哋都會用、我冇諗到你會咁介意囉，咁呢個袋原價貴吖嘛、我喺間舖頭見佢平好多咪買嚟氹吓你開心、鬼叫你前日話我唔錫你、而家咪買禮物比你囉
然後佢講講吓…我忍唔住喊咗出嚟…..
唔知點解嗰吓覺得好侮辱，真係寧願佢乜都唔送，都好過送個好殘嘅二手袋、仲要佢覺得唔平
到第日佢訓醒，佢話見我唔想要，拎咗去退了，然後係咁話退咗啦當冇發生過啦，唔准再提唔准嬲
其實我真係唔要求佢送咩貴重嘢比我….一齊咗咁耐，點解唔可以重視吓我…衰啲講我要求已經低到佢淨係送粒朱古力比我我都好開心了，如果佢會主動book餐廳話帶我出去食飯，我覺得我真係會劏雞還神…..😞😞
