皮膚差好自卑(長文)

匿名

我塊面都幾多凹凸洞，背脊同膊都有暗瘡印，以前暗瘡好多，細個父母唔識帶我睇西醫，試埋曬啲中醫，浸腳，針清。大學先自己去睇西醫食抗生素好返，少出咗好多。呢段時間經歷咗好多，心路歷程唔係三言兩語可以講到。簡單啲嚟講，就係你應該最青春自信嘅時候一次次因為皮膚而對愛情卻步/自卑，因為同學嘅一啲言語而黯然神傷，甚至連鏡都唔想望。我爬過文，睇過好多片好多case，我敢講我生活模式健康過8成人，但皮膚9成靠基因。我老豆後生都係多暗瘡，但只係背脊生，暗瘡基因應該遺傳並加強咗。打機同個女仔識咗一年，日日傾冇間斷，打電話吹幾個鐘水，但諗起見面嗰下可能會見光死就好down(雖然知佢唔係啲咁嘅人) 其實我冇乜心動嘅感覺，因為已經自卑咗太耐，覺得冇可能，只係因為男性注重係異性面前嘅外貌先會咁down，怕佢失望，怕佢見面第一句唔係平時咁講笑而係話我皮膚差。網絡完美咁隱藏咗我嘅自卑，可以自信咁講笑，唔需要好似現實咁不斷同對方錯開視線，怕佢仔細咁睇我塊面。我一生中只同三個異性朋友有較深嘅交集，一個小學，一個中學，一個打機識。小學識嗰個女仔好靚，我份人被動，佢就日日返學同我吹水同玩，放學打電話同我吹幾個鐘水都唔肯沖涼。後來佢借frd把口同我講中意我，我嗰陣怕醜+屋企有事搞到我情緒有問題，神推鬼㧬下居然話唔中意佢(其實彼此都中意對方)，後來我小五小六開始出暗瘡，自卑，故意避開佢，關係淡咗，宜家睇返佢ig真係好感慨。中學識嘅女仔係我唯一拍過拖嘅女仔，我都唔知點解我嗰陣出暗瘡出得咁勁佢都肯同我一齊，佢係一個好女仔，係我莫名其妙嘅自卑心搞到段關係走到盡頭。過程我唔講太多怕自爆(唔想比frd知道我脆弱自卑嘅一面，認出都勿相認，當係彼此嘅秘密) 當一個人自卑到極點嘅時候就算冇事都會諗，我值唔值得擁有? 好小事就會諗，對方係咪開始嫌棄我? 情侶之間應有嘅一啲行為eg深吻，貼/mit面，對視。。。完全唔敢做，可能呢一世都唔會感受到肌膚相親嗰種甜蜜，要下世先得。係我中學升u嘅時候，因為睇極啲垃圾中醫/搽護膚品都好唔返，我放棄投資塊面，轉咗去做gym，宜家操到幾大隻下，SBD(kg): 150/90/150。但膊頭同背脊有啲暗瘡印係度，同frd去水上樂園都要著連上身嘅泳衣，好老土。諗返曾經受過嘅說話真係好自卑好hurt，試過比阿媽當街大聲談論我啲暗瘡，試過去廁所聽到同學話我塊面好恐怖，試過比同學當面問我係咪燒傷，試過好多好多。宜家我挨過咗，睇淡咗，但年輕人應有嗰份自信同朝氣已經離我而去，直到近排同打機嗰個女仔約好出嚟見先勾起返嗰份深藏嘅自卑。我原本以為睇淡咗，宜家先發現心中嘅傷口根本冇愈合過，揭開血痂下依然係猙獰嘅傷口。我想掙扎，唔想下世先過返正常人嘅生活。香港有冇激光/皮秒嘅診所推薦，背部暗瘡印有冇藥膏推薦? 希望各位因皮膚問題而自卑嘅人共勉之，你已經好堅強。