台灣月老就聽人講得多， 但遠在香港根本無得親身去，最多只可以求吓線上月老嘅籤(;´༎ຶД༎ຶ`) 所以決定今日出post分享吓我拜黃大仙月老嘅經驗！ 希望有人睇啦～ 事緣小妹今年年頭情場失意，一方面想同本身嘅對象修補到關係，但其實個心都死咗大半。 因為對方真係做咗太多令我失望嘅事，講好嘅嘢又成日做唔到，於是我都諗會唔會可以求到個真係適合我嘅另一半。 我當時去嘅時候買咗少少糖同朱古力～都係一兩盒左右。門口係會有好多人賣香同各種貢品啊垃雜嘢咁，不過我係無買到嘅，都唔太需要特別花依筆錢。 入門口搭完電梯上去之後，佢會有個位俾你拎香，拎九支然後點著佢哋，跟住指引去三個地方，每個地方拜拜再插低三支就可以了。之後就可以去月老嗰到拎條紅線，擺個手印，心入面默念你想求嘅嘢，默念完之後再綁好喺金童玉女到就OK。具體手印擺法同紅線嘅綁法可以上網搵，係有少少難的，睇多兩次練吓就得，最緊要係誠心誠意、同埋清楚咁講曬自己想要啲咩，跟住落嚟嘅嘢就交俾月老啦。 我當時對月老講嘅嘢大概係： 我係（我嘅全名），出世日期係新曆嘅（出世年月日）。我心入面仲係未放得低喺新曆（對方出世年月日）出世嘅（本身對象嘅全名），如果可以嘅話，我希望可以修補我同佢嘅關係，佢會好好對待我，我哋會一齊落去。如果佢真係唔係適合我嘅緣分嘅話，我希望可以有一個新嘅另一半出現。我想佢係（各種我想要嘅條件）。 其實我嗰陣都講咗好多條件，由髮型、身高、膚色、五官、性格、興趣、對我幾好幾錫我，我都差唔多講曬出嚟。真係大膽啲，講曬你理想情人嘅特質就得㗎啦🤣🤣我都相信月老會幫我安排一切！ 跟住我就去咗求籤，大約都係問吓我未來半年嘅感情會唔會順利、生活如何之類。不過要留意嘅係我去嗰陣黃大仙係無筊可以借嚟擲的，可能要自備。搖完籤筒擲完筊之後，就可以mark返低個number然後去撳部電子籤文機拎返張籤～解讀嘅話上網搵或者搵出口嗰邊啲檔口解都得，不過我係自己上網睇。 拜完後我都醒唔起有件咁嘅事，直到我遇到我現任。一開始其實我都唔係話好留意佢，係相處一段時間後先開始對佢越嚟越上心，然後佢同我表白、一齊咗後，我先醒起佢嘅條件其實都中曬我當初求嘅嘢！！！嗰下真係超級驚喜(˶‾᷄ ⁻̫ ‾᷅˵) 仲要每一齊耐啲都會發現同佢真係好夾、相處得好開心，而佢都好珍惜我，每一日都過得好幸福。 我同我男朋友一齊嘅時間距離拜月老大約係5.5個月左右，所以真係急唔嚟，要相信最好嘅緣分係需要時間鋪墊嚟到你身邊。然後我決定一陣再去買啲糖同朱古力去還願，多謝月老！！！！ 都多謝睇到依到嘅大家，祝你哋有拖拍嘅甜蜜幸福，無嘅話早日遇到值得嘅人！