我真係好掛住你點解你要走得咁突然
匿名
最近俾阿爸阿媽催婚，問我算有D錢，點解都唔識個男朋友，話乜嘢身邊啲人已經結晒婚生埋仔冇理由我無動於衷，但係我想講嘅係我嘅Crush已經不復存在。
我曾經有一個好愛我好錫我嘅男朋友，由中學開始我哋一齊拍拖，大學嗰陣時我冇錢讀書，屋企人都唔贊成我繼續讀書係得佢願意為我付出做辛苦工供我去讀書。大學畢業之前我已經一早認定咗佢，準備結婚，就好似香港好多對普通嘅情侶咁樣。
因為我唔係讀一啲好嘅中學我同埋我男朋友讀書成績都唔係好好，但係我就掹車邊入到大學，讀護理，佢就冇諗住再繼續升學，中學畢咗業之後佢一直做地盤，然後將一半嘅人工俾我去讀書，佢俾錢我讀書捱到我大學畢業之後就去咗考消防搵到份正正經經嘅工，佢諗住儲到幾十萬之後就娶我，貌似所有嘢都係向着未來嘅憧憬進行。
就喺我出嚟做實習護士嘅第二年，佢出咗意外，夜晚比酒駕車撞，入咗ICU，而咁啱就係我嗰陣時實習緊嘅嗰間，一開始我淨係知道有一個好嚴重嘅車禍俾人送咗入嚟，全身都係血，然後見到有幾個houseman衝過去，之後我隱約聽到佢個名，我嗰陣時內心好驚，但係諗住同佢撞名嘅人香港都有好多啦，應該唔係佢，就冇咗一回事，繼續去巡房派藥幫人量血壓，直至第二日我都仲係收唔到佢覆我嘅message我開始驚我擔心，我忍唔住去ICU嗰邊睇吓係邊個，我先見到佢全身裹住繃帶紗布，插着呼吸機冇晒意識咁樣瞓喺度，唔知佢幾時先可以醒返，我一直等，一個月兩個月三個月….每日夜晚我都會祈禱，希望奇蹟發生，但係係冇㗎。我明明係一個護士，專職係幫人，我明明可以幫佢，但係我同佢嘅距離就係一塊玻璃，我就只可以隔住塵玻璃一路望住佢，我想掂佢都掂唔到。
過咗6年，佢都係未醒返，佢屋企本身都唔係有錢已經支持唔住所有嘅醫療費用，所以就決定拔喉，唔再搶救佢。拔喉嗰日，我請左假一直陪喺佢床邊，我一直叫佢個名，一直講我同佢嘅相識同一齊做過嘅嘢，但係佢就好似瞓得好冧，一D反應都冇，我一路講，個嘴越嚟越咸，好似飲緊鹽水咁，佢塊面同件格仔病人衫上面已經濕左一忽，佢仍然唔理我，可能佢發緊一個好美妙嘅夢，所以唔想醒，喺夢入面佢可能幻想我同佢好美好，一齊行紅地毯，一齊有小朋友，有小康之家……..我之前同佢一齊拍拖嗰時，一齊登記左器官捐贈，拔喉佢嘅器官全部捐左出去，救左1個BB，2個年輕人，但自此以後，我嘅命中注定亦都係我呢一世人唯一嘅Crush不復存在。
喺佢過咗身嘅一年之後佢屋企人俾晒所有佢嘅遺物我，我睇返佢部手機先知道原來嗰晚佢買咗甜品嚟搵我，佢只係想收工之後陪吓我，呢一切嘅原因都係因為我前一日發牢騷同佢講「你成日掛住返工都唔理我。」
我成日會諗，如果當初佢冇俾車撞，會唔會我同佢依家已經結咗婚組織到小康之家？
我好希望有一日瞓醒之後發現返返去嗰段幸福嘅日子佢喺我身邊而我可以再抱住佢一次，同埋提醒佢嗰日千祈唔好買甜品唔好嚟搵我，但係可惜所有嘢都係我幻想出嚟
我淨係知道我一直都放唔低佢，今日係佢走咗嘅第8年，我只係想同佢講一句：你返嚟啦好嗎？我掛住你啦。你唔好咁狠心拋低我啦
珍惜眼前人
