要怪就怪自己以前冇好好讀書
匿名
有朋友send咗個dcard post俾我睇，話我一定有共鳴，我自己睇完都有感而發，其實我自己係年輕爸爸。
2021嗰年考DSE，本身同女朋友拍咗幾年拖，大家讀書都唔叻，亦都唔係讀啲咩名校，不過雙方屋企環境都唔錯，我自己就係因為諗住生活無憂，所以一直都好懶惰。
平時都係打下波打下機，陪下女朋友咁，去到2021一月左右發現佢有咗，我認我係冇用套，係我唔啱。最後屋企人都支持佢生，佢就冇考到DSE，專心去生BB，我自己考完試都冇讀書，日日返工，飲食運輸零售派傳單都做過，雖然屋企環境唔錯，但係自己搞出黎嘅話禍，都係要自己負責任，有時返工受下氣都要，我亦都唔怕辛苦。
而家個女都兩歲幾，我都已經冇再打波同打機，一日打幾份工，就係要搵錢，老闆要搵人頂更，我頂。老婆專心喺屋企湊女，我一個月搵到兩三萬，都夠我哋三個用，間屋係佢爸爸借俾我哋住，身邊嘅人間中有啲閒言，我都當聽唔到。啲舊同學而家去下旅行周圍食下好野咁，我就冇呢啲經歷。
我又唔會後悔嘅，因為都冇時間後悔，我知自己冇學歷，我最擔心嘅係個女大個之後會點睇我，同埋將來返學會唔會俾同學或者其他家長笑。其實我真係好愛老婆同個女，我屋企人以前係俾到唔錯嘅生活我，我都希望可以俾到好嘅生活屋企人，可惜我暫時做唔到。
要怪就怪自己以前冇好好讀書。
