（長文慎入）拍拖4年 想分手
匿名
我男朋友係我第一個
一齊咗4年 拍拖一年後同居
最近慢慢覺得好似對佢感覺變左
唔係自己想要嘅人 開始唔想行落去
佢大我3年出黎做緊野
我今年大學畢業 準備出黎做野
佢對我都唔錯嘅 平時我諗都算叫錫我
可能出去會幫我拎下袋
生日送野比我
有陣時都會比下驚喜
有時肚餓會主動買野比我食
但我同朋友講
呢D係基本要做到既事
好啦 我唔清楚
我同左佢4年 近呢一年幾乎完全冇性生活
我知佢冇出邊搵女人
因為我地有share location
同居加上我直覺好準
基本上好肯定冇
但我覺得佢可能都厭掛
加上我覺得我同佢完全冇emotional connections
平時唔會分享生活事
我唔會分享心事 因為佢有時說話講野好難聽
又或者話冇共情能力
我同佢訴苦 佢都淨係喔、或者會講左第樣野
久而久之 我唔會同佢訴苦 我會同其他朋友講
我同佢分享過呢個問題 佢話佢係咁 改唔到
我冇要求佢改 唔想夾硬改變人 亦改變唔到
我可以自己消化痛苦
但我發現我慢慢變左乜野都唔想同佢分享
亦都開始覺得佢好似一個空殻 入面冇靈魂
好無情 亦到好冇同理心
例如 我黎M 個人唔係好舒服 早餐食唔曬
冇胃口 同左佢講 佢完全冇反應
淨係話我又做乜食唔曬 佢唔會關心我個人
又或者 有一日 我去廁所我去到死死下
出番黎 佢訓左響度 佢第一句唔係問我有冇事
而係問我幾時可以幫佢按摩
（我夜晚會幫佢按摩氹佢訓）
今年我學校都多野做 最後一個學期好重要
因為我唔合格就畢唔到業 拎唔到份工
份工好難爭 係MNC黎 萬裡挑一 難得拎左offer
所以我一定要把握 佢都知我好緊張個機會
我讀書唔錯 但我都驚失手 所以緊張左少少
但佢好想去旅行 成日問我可唔可以走堂去
唔止問一次 係成日都問 但我話左唔可以
想佢比我讀埋先 好緊要
但佢都死纏爛打 係咁問
仲有好多好多 我覺得我地既關係好奇怪了
拍拖睇戲食飯
睇戲唔會分享劇情 唔會分享個人諗法
我有好多感受既人 但分享唔到
食飯 各自撳手機 我平時叫佢放低佢都唔放低
唔會傾偈 有時候望住隔籬枱我好羨慕
見到有情侶 一齊食飯，傾偈有講有笑
咁當然可能係熱戀期掛咁
但係我見到爸爸媽媽食飯都係會一齊傾偈
（我係一個E人）
最近諗番起好多好多唔開心既回憶
最記得係意大利既街頭鬧交扔低我一個
滑雪既時候 我跌親 佢冇等我 自己滑左落去
去睇演唱會我太興奮大叫佢鬧我
成日情緒勒索我
仲有好多好多
我知道 可能有人覺得好少好少事
但慢慢積埋 我覺得
我其實係咪唔值得一個再錫我多D既人？
會唔會下一個更好？
我第一次拍拖 自問脾氣都唔差 唔會亂發脾氣
次次嘈都係我認錯先 我平時會嗲佢 會接放工
我承認錢我相對黎講冇付出咁多
始終我都係一個學生 冇穩定收入 都幾緊張錢
佢亦都付出左好多 好感激佢
但我最近開始諗拍拖係咪淨係攬住一齊食飯就係情侶
係咪同床共枕就係情侶
係咪冇出軌唔煙唔酒唔睇女就係好男人
我開始對呢段關係慢慢無感
每日好似同緊一個空殻一齊
我有同佢傾過呢個問題
佢話佢個人就係咁無情
佢話對其他人係10分 對我60分
但其他人對人可能係50分 對女朋友係60分
所以佢比其他人好
佢話佢已經好盡力 對我好好
嗯… 聽完 我冇野好講 好無語
講到呢度 想問下大家
你地覺得我應該去再試下維繫多陣
同佢坐低傾下
定係直接提出分手
我承認對於4年感情既佢講分手我係有恐懼同不捨
對唔住 篇文有D長 想問一問大家既意見
多謝🙏
