懷疑自己唔鍾意男朋友

Anonymous
希望大家唔好一望到個標題就話我先!想講下個背景先 我20歲,男朋友同年,我讀梗書佢出梗黎做野,佢表白開始左我地段關係,我地一齊左一年了。 我係一個現實幾多人追嘅女仔,男朋友當時係追求者其中一個,個陣覺得佢最啱傾,最體貼最啱自己feel,曖昧左大概一個多月就一齊左了,但係呢排我開始質疑,自己係咪真係鍾意我男朋友。 啱啱一齊個陣,拖手,攬攬我都會好心動,一開始我自自然然覺得我心動係因為我鍾意佢,後未種種諗法都令我覺得,我之所以心動,可能只係因為我上一次拍拖係兩年前,已經好耐無同人身體接觸過。 有時佢剪左頭髮,佢問我靚唔靚仔,我就係讚唔出口,一齊耐左,雖然無講出口,但我心入面開始嫌佢著衫唔夠好睇,覺得佢講野直,覺得佢唔上進,我甚至有個好賤嘅諗法,如果當初唔係同佢一齊,而係同第二個追求者一齊,更靚仔更大隻…諗到一半我都會覺得自己咁嘅諗法太賤,又開始質疑自己係咪真係鍾意佢。 我覺得令我對佢嘅愛逐漸減少嘅原因係,一齊之前,佢show俾我嘅佢係一個陽光,鍾意運動,三觀良好嘅男仔,但一齊左之後,我先慢慢揭穿,佢鍾意落club,食水煙,吸大麻,電子煙,鍾意無所事事,我好驚,我從來未接觸過呢d,我真係好反感,我為過呢d事向佢提出分手,但佢向我保證永遠都唔會再做,但我心中始終有條刺,我無辦法接受佢曾經係個咁嘅人,我覺得我地係兩個世界嘅人。 我屋企多得父母年輕打拼,算得上高產家庭,住梗三千萬獨立屋(for background)生活唔使煩惱洗費,通常我想要d咩就會獲得d咩,我並唔係炫耀啲咩,我當然知道呢一切唔係當然,為此我盡我最大努力讀書,做好自己,因為我讀梗law,所以我嘅目標都係考律師牌,希望將來可以盡d力報答父母。 而男朋友住梗公屋,首先聲明我並無帶任何有色眼鏡,我認為社會地位並唔可以定義一個人所有,只不過,我肯定父母知道我男朋友屋企住公屋,大機會都唔會應承我地兩個一齊。男朋友依家返嘅工,叫做係辛苦工,每日人工計埋大概700蚊,但係我買件衫買化妝品,可能一洗已經幾千,佢每次爭住俾錢,我都會拒絕,因為我知道呢d錢都係佢辛苦返工得黎,我自己有能力就自己俾,但佢每次都覺得我睇唔起佢,慢慢時間一長,我同佢出街儘量都會無行街,如果食野,就儘量揀d平價餐廳。 慢慢地我發現我地生活水平,質量真係存在差別,到時我畢業,如果順利考牌,我相信我地之間嘅距離只會越來越大。我開始苦惱,未來條路要點行。 我覺得自己並無想像中咁鍾意佢,因此我設法去彌補,佢想要嘅ps5,遊戲機,電腦,全部我都買曬俾佢,佢提過一嘴鍾意嘅衫,我第二日就偷偷去買,鞋,數得到嘅已經送過十幾對俾佢,因為我好內疚,我覺得自己賤格,如果佢知道我並無咁鍾意佢,佢一定會好難過好難過。我想分手,但佢每次一對我好,我都講唔出口。 但最近我發現,每一次出街我都唔再想拖手,唔想攬唔想錫,好想一切到此為止。但我咁樣真係好衰,因為佢好愛我..
LikeHaha
103
30 comments