因為男朋友私樓搬去公屋？
匿名
我同男朋友拍咗兩年拖，感情都穩定，亦都感覺對方俾到好多愛同安全感我。不過佢出身基層，屋村長大，住緊公屋。
我雖然唔係富裕家庭，但自小都係住私樓。我父母知道我男朋友家庭背景，都有少少微言，成日講到公屋好恐怖，品流複雜。
我上過去佢屋企食飯，的確環境同私樓有出入，除咗冇會所設施，公共空間都比較污糟，保安方面就自出自入。（希望如果有人住緊公屋嘅，睇到呢度唔好介意，因為呢個真係我嘅印象，如果有任何冒犯嘅話講聲對唔住🙇🏻♀️）
我男朋友父母打算搬出，留返間公屋俾我男朋友同埋我住，而我哋一直都想同居。當然，我需要說服家人，但其實都坦白講，我自己都要過到自己嗰關。
因為我父母由細到大都叫我唔好群住公屋嘅人，我知道佢哋係有偏見，但都令到我對住公屋有負面印象。所以想問問大家，如果從小住私樓，住公屋會唔會有啲唔適應？有冇啲乜嘢需要注意？我想有個心理準備，同埋說服我家人。多謝大家
對唔住，希望大家唔會睇到我呢個post之後有唔舒服嘅感覺，我真心唔係歧視公屋，只係怕唔習慣🙇🏻♀️🙇🏻♀️🥹
