想睇吓大家對件事點睇
2021年12月27日 01:35
更新
更新一下先！睇完你哋啲comment 我都有盡量改變一下自己（少少啦）而好消息嘅係，我終於喺大學入面識到一班好好嘅朋友。佢哋唔會因為我之前喺外國讀書所以對我有啲乜嘢特別嘅睇法，佢哋就當我好似係一個好正常嘅僑生或者台灣人咁溝通，亦都會得閒約下大家出嚟行街食飯 所以overall都係幾開心嘅🙃
同埋都想多謝下喺下面comment嘅人😊都算係陪我行過黎台灣第一個嘅難關。其實最初真係冇諗到會有人comment，始終第一次po嘢，同埋喺po之前，我都預咗可能會有人黎話我，好彩嘅係暫時未見到有😂hahaha
所以最後都係講返句多謝！
___________________________________________________
原文
‼️長文
本人嚟到台灣讀書之後 發現喺同同學相處上唔係想像中咁好 咁講我個故事之前講吓自己嘅背景先 咁我係喺台灣出世之後喺香港讀書 直到中四去咗外國 最後先至選擇返台灣讀大學
咁喺台灣大學嘅第一日 就識咗幾個同學 之後大家就介紹吓自己咁啦 咁當然我亦都會講到我啱啱同大家講自己嘅背景 咁其中一個同學自從知道我係外國讀書之後對我嘅態度就麻麻 就例如其實佢之後想去外國讀書 咁佢就問我一啲有關於喺外國讀書嘅時候可能會遇到嘅問題或者我自己遇過嘅事俾佢參考吓 咁我係好認真咁講述我嘅親身經歷 點知佢好似覺得我喺度show off 亦都會有時得閒就走過來串我話「得啦知道你勁啦 知你係外國返嚟係唔同啲㗎啦」我當下其實係呆咗 當下真係心諗一開始又係你自己黎問我亦都唔係我突然之間走過來同你講我自己啲事 但係講完之後你又好似唔撚想聽咁 加上因為我自己本人並唔覺得係外國讀書係一件可以用來show Off嘅嘢 或者係啲咩特別嘅事 因為其實而家去外國讀書係真係非常非常之正常 所以當我講我自己啲嘢嘅時候純粹想大家了解吓對方 而且一開始介紹自己嘅時候都係啲同學問我而唔係我自己講嘅 講真 我真係唔係嗰啲好outgoing嘅人 所以我並唔會主動咁樣同人哋講自己啲事 除非就係人哋自己問
所以我想問吓大家 其實我係咪唔應該講我自己嘅背景之類嘅嘢 因為我真係唔想人哋覺得我喺度show Off
