大家好~~非常感謝Dcard所有前輩們分享嘅定居文，因為真係幫到好大忙，近期都成功拎到定居，借男友嘅account分享，希望可以幫到大家。 2023年7月嚟台灣，2024年5月開始第一份工作，2025年1月離職，2025年4月開始第二份工作。2026年3月底申請定居、7月底審批成功、8月交回居留證、換取台灣身分證。 兩次工作證申請方法有唔同，第一份工係用評點制申請嘅工作證，而第二份工係同香港朋友合夥開公司申請嘅外藉經理人工作證。 申請當日交以下文件： 1. 中華民國臺灣地區入境居留/定居申請書 2. 香港澳門居民申請居留定居申報書 3. 香港或澳門居民身分確認書 4. 婚姻狀況說明書 5. 設籍地址證明文件正副本 6. 戶長同意書 7. 居留證正副本（副本正反面都要印） 8. 香港身份證正副本（副本正反面都要印） 9. 護照正副本 10. 定居規劃書 11. 居留期間活動證明（交咗第一份工嘅合約同工作證副本、華語能力測試證明） 12. 勞動部工作許可函正副本 13. 勞工保險投保證明 14. 出糧證明 15. 掛號回郵信封（寫有收件人姓名、地址、郵區、電話；郵票當日喺郵局買） 16. 證件相 17. 申請費用台幣$600 當日移民署好少人，由拎飛到完成只係用咗20分鐘就走得。臨走前承辦人提醒如果要出國唔好超過三個月，如果唔係就要補交身體檢查等資料，同埋唔需要事前通知佢哋。 關於勞工保險投保證明，公司可以用居留證/護照去保勞保，所以去申請投保證明要注意。當初申請嘅時候上面只有第二間公司嘅資料，問返第一間公司人資先發現佢哋係用護照去保勞保。 5月7號收到補件通知： 1. 現居地租約影本 2. 定居規劃書文末加簽名及日期 5月23號打去移民署詢問，回覆話有收到補件，有咩事情或者需要其他補件會再通知。 6月8號有兩位移民署嘅職員來訪我工作地方，最後有加Line要我send一啲營運證明，好似過去半年幫員工保嘅勞保證明、會計報稅證明etc.，感覺要確認公司係咪運作緊。 由於有加Line，有日問要提供一位員工嘅電話，話會打俾佢訪問佢，大概內容係問個員工同我點識、點解會嚟做、問我係咪有返工之類有關於我同果個員工嘅問題。 7月30號收到信叫我交返居留證，喺8月交回居留證，一個禮拜後收到掛號並成功換到身份證。 另一個原因想分享定居文，係發覺透過HF169成功定居嘅多數都係用評點拎工作證，返工到一定日子再遞表申請，而好少係用創業開公司成功。當初返嚟台灣其中一個原因係想創業，既唔想浪費HF169哩條路，又唔想用投資移民嘅方法。當時爬好多文都係講一定要申請工作證返工先成功，所以想嘗試搵開公司有冇辦法申請工作證。最後搵咗「台北創業家」協助喺台灣開公司兼申請外藉經理人工作證，喺台灣合法地工作，而工作證最後批嘅期限係兩年。 真心覺得喺台灣開公司嘅流程真係好繁複，加上幾個合夥人都係香港人，喺台灣屬於外資需要嘅資料再會多啲，所以決定搵專業人士跑晒成個流程，只需要按照指示交齊資料、到銀行/政府機構辦事就可以。但有心理準備開公司唔似香港幾日就搞掂，因為好多時上一步批文未到手，下一步都冇得做，中間可以做嘅只有等。而我哋由交資料俾台北創業家開始搞，到拎到工作證，中間包括喺香港準備資金嘅時間，啱啱好係一年。 最後，無論大家有冇意願申請定居都好，希望喺台灣生活緊嘅你，都能夠平安快樂！