[長文慎入]致我愛的人。我會赤足走上你踏過的泥土。
比我愛嘅你：你畢業喇，我要接受從此唔再喺呢一個相識嘅地方見到你瀟灑嘅身影。喺中大每一寸同你一齊行過嘅土地，我想赤腳再行一次，比我地曾經踏足過嘅沙石鑲嵌入我嘅腳底，割傷我嘅皮膚，希望呢段美好嘅回憶會刻喺我嘅靈魂入面，而我亦要喺呢一條路上收拾返自己嘅碎片。我知道你放唔低舊愛人，而我亦唔係你最想要嗰種女仔，所以即使我地開心過快樂過，始終你冇辦法接受我。我有憎過你，有恨過你。不過，呢一份憎呢一份恨都係緣於愛。而我其實心底入面明愛無對錯，我冇任何野可以怪你。放唔低前任接受唔到其他人，唔係你嘅錯。睇住你晚晚聽傷心情歌訓，我都好心痛好心酸，好想你快啲走出黎，但係事實證明你我都嘗試過努力過，但係我始終唔係你嘅對的人，冇辦法令你忘記佢而愛上我。你係對朋友好好，只係對我唔好。而且，我每次遇到愛嘅人，都會問自己一個問題： 我比到幾大嘅幸福佢。我自問由細到大屋企人朋友都好錫我，有咩粗重功夫都唔係我做，考試功課都係人地deadline前會主動提我。咁樣嘅我同一個小公主係冇分別，冇人可以依賴我。我自己又蠢又笨手笨腳，點樣比幸福你。而我知道，你都係一個好需要依靠嘅人。好遺憾，即使我幾努力，我都只會係一個負擔，唔會係你嘅賢內助。我以前成日同朋友講我唔會真係愛你，因為接受唔到你嗰種玩命式夜夜笙歌嘅生活，又成日做埋啲危險野，但其實我只係逃避緊自己其實都好嚮往你過緊而我冇嘅生活。好羨慕你有一班好兄弟好朋友，有咩事都撐住你感情好深，又晚晚有得玩通宵，玩啲野又好癲好瘋狂。雖然我都有啲朋友陪我玩，但就係都乖乖仔女，冇玩得咁痴線都冇咁親密。係你比多左呢個世界我睇。記得有次我要去酒聚，你問我洗唔洗車我返去，我好驚訝咁話吓你有車嘅咩，你話你有手推車，可以比我坐上去一路碌碌碌我落山。喺星空下比自己中意嘅男仔咁樣碌我落山，一路比晚風吹，比起坐喺乜野名貴私家車入面更加浪漫。我要嘅不過係呢一種呢種好玩嘅探險式浪漫。我知道當日嘅浪漫今日唔會再復現，望住你由當日會對我撒嬌嗲我，每做完一陣野就好開心咁衝過黎攬我錫我到到變成今日嘅厭惡我避我，我睇住呢個過程發生而我咩都做唔到，我明白再留住你都冇意思，你都唔再對住我笑。我講過我會等到你畢業，我做到了。呢半年我冇接受任何人，都冇比任何男仔掂過我，朋友拉都冇去老蘭，冇曖昧對象。呢一個承諾只約束我，我做到對你嘅承諾了。真正嘅愛情包含忠誠，希望你日後回想會知道有個人為你堅守過。呢一份愛情，經得起試煉。
