入門級簡介：各類人格分類學系統

因為好無聊，所以我又黎出po了~ 今次想比各位了解一下唔同人格分類學嘅系統，比有意入坑嘅朋友仔們認識下佢地各自有咩特色。

喺正式介紹之前，我想首先界定一下「人格原型」同「人格特質」之間嘅分別。【人格原型vs人格特質】原型（archetypes）：不可浮動。描述人格原型嘅系統假定人有一個人格基底，通常係與生俱來或者好早已經形成。雖然人嘅個性的確係會隨住時間推移同經歷而成熟甚至有所改變，但係佢地只係一種人格原型遇事後嘅反應，就好似你加糖落咖啡，佢本質上都係咖啡一樣。由於人格原型較難觀測，因此好難獲得科學認證，亦都好難單靠填寫人格測試黎獲取準確嘅結果，甚至有人提倡應該將呢類理論歸納入哲學。特質（traits）：可浮動。描述人格當刻嘅狀態，通常都係較客觀嘅特性，例如一個人是否有責任心、是否接納新嘅變化、是否有上進心等等，人格係有機會隨住時間推移而對呢啲方面保持不同態度，不過與狀態不同，特質通常都比較穩定，成年後基本上都唔會產生太大變化。由於人格特質較容易直接觀測，因此都較容易獲得科學認證，可應用於學術研究之中。記住以上兩者嘅分別，因為接下來我要講解嘅內容會同呢兩樣嘢有啲關係。準備好未？Go！ 1. Big 5 / OCEAN 測量：人格特質目前科學認受性最高、學術應用最廣泛嘅性格測試，大部分心理學學術報告都係運用Big 5作為性格測試指標。最基本有五個維度：神經性、外傾性、經驗開放性、宜人性同盡責性，而根據情況需要，更可以細分成多達二十幾個維度。Big 5以0-100%分數計量每個維度嘅傾向，非常簡單易明，可以反映出你當刻對每個維度嘅偏好。例如外傾性越高，就代表你越願意與他人互動。另外，唔同維度之間都可以組合出唔同效果，例如高神經性+高經驗開放性，代表咗一個人具備創意嘅潛能。由於Big 5係測量人格特質，因此測量數值係有機會上下浮動，不過都唔會浮動得太誇張。詳見：

2. NERIS 測量：？？？ NERIS係16personalities.com自家研發嘅理論，不過其實無乜科學根據，而且一手借用Big 5嘅五個維度，另一手借用MBTI嘅命名方式，實際上只係一個不倫不類嘅混合體，難以準確測量人格狀態或原型。所以非常唔推薦參考。

3. MBTI 測量：人格原型 MBTI嘅歷史之前都專門開po講過，係上世紀50年代由一對作家母女根據榮格《心理類型》制定嘅一套人格指標，希望幫人搵到適合自己嘅工作。MBTI以榮格提出嘅八款認知功能，排列成16種唔同嘅人格原型，幫助人搵到自己嘅思維運作模式。每個功能排列嘅位置都有唔同作用，例如每個人都有一種默認嘅主導功能，主宰我地平日看待世界嘅方式，而其他位置嘅功能亦會喺唔同時候進行各種互動。MBTI人格類型終生唔會變動，但係可以發展其他較弱嘅功能，變得更加成熟。詳見：

4. 九型人格測量：人格原型起源為中亞某部落嘅靈性圖騰，後來於1950年代受到心理學界嘅關注，漸漸發展成一套人格學理論。用九種唔同嘅核心恐懼同渴望，解釋唔同人格嘅動力及遇事反應，例如想追求嘅人生目標、防衛機制等等，並且可以根據狀態上升或下降型號。除咗以數字表示嘅核心型號（Core type）之外，後來又發展出各種附帶理論，例如側翼理論、本能副型、Tritype等等，以更深入嘅方式解釋唔同人格應對核心恐懼嘅分別。由於九型人格研究嘅恐懼同渴望屬於本能嘅範疇，因此終生都唔會改變，不過心態可以變得更健康。詳見：

5. Socionics 測量：人格原型由立陶宛心理學家Aušra Augustinavičiūtė於1970年代根據榮格《心理類型》發展嘅人格學理論，可以話係東歐版嘅MBTI，以八種元素（與功能相似）組成16種人格類型，不過更為深入同埋較多硬性規定，以及對功能嘅定義、排列嘅方式同MBTI有所差異。後來又發展出好幾款唔同嘅模型，目前最多人用嘅係Model A同Model G。Model A與MBTI較為相近，而Model G則添加咗大量理論，甚至可以話係重新定義咗榮格嘅作品。例如，Model G以人同社會之間嘅互動，解釋人嘅個性同社會使命之間嘅關係，主張人嘅主導元素/能量本性係自私嘅，唯有透過其他功能嘅協助，先可以為社會帶來效益等等。由於Socionics一樣都係研究人格原型，因此人格類型終生唔會變動，不過亦有subtype等理論解釋人格體現方式嘅變動、能量嘅增強等等，會喺人生遭遇到唔同嘅重大事件後產生改變。詳見：

6. Classic Jungian 測量：人格原型由數名心理學家（包括榮格妻子）根據榮格《心理類型》發展出嘅人格理論，目的為盡量忠於榮格嘅原作，因此保留咗好多原作對於各種認知功能嘅定義，並且同MBTI最大嘅分別為，MBTI使用IEIE/EIEI嘅功能排列方式，Classic Jungian則係使用IIEE/EEII嘅排列方式。同MBTI一樣，Classic Jungian類型終生唔會改變。詳見：

7. Attitudinal Psyche 測量：人格特質由Rob Collopy於2015年開始根據Alexander Y Afanasyev提出嘅四大心理功能理論發展而成，屬於較為新興嘅人格分類學理論。AP主要描述人對四大心理功能嘅態度，四大心理功能分別為意志（V）、邏輯（L）、物理（F）同情緒（E），排列出1到4嘅次序，組合成24種人格類型，並且每個排位都有各自嘅特性，例如我地對待排第一位嘅功能係自信+主動，對待第二位嘅功能則係自信+被動等等。AP人格類型係有機會改變，不過唔會變動得太劇烈，都係相較穩定。詳見：

8. 四種氣質測量：？？？源自於古希臘嘅性格分類，可以話係人類史上最古老嘅人格分類學理論。古希臘人認為人可以分為四大種氣質，分別係血液（對應多血質）、黏液（對應黏液質）、黃膽汁（對應膽汁質）同黑膽汁（對應抑鬱質），唔同嘅體液比例會有唔同嘅性格體現，例如多血質會更衝動，粘液質則會更外向等等。另外，四種氣質理論認為人可以只有一種單一氣質，或者係兩種氣質嘅混搭（一主一輔），總共可以排列出15種人格類型。目前對於氣質會唔會改變尚未有定論。詳見：

⚠️溫馨提示一下，唔同人格分類學理論之間或許會有唔少共通點，尤其是同樣係基於榮格《心理類型》嘅幾套系統，但係其實系統與系統之間或多或少總係會有啲差異，所以唔好以為可以直接轉換。例如本INFP去到socionics之後驚覺自己原來係EIE（相當於ENFJ嘅概念），所以真係唔可以偷懶，睇完MBTI就以為自己識曬所有系統呀！至於點解我咁鐘情於研究人格分類學呢？我估大概係因為我好鐘意深入了解自己嘅關係，好想借助唔同嘅理論解釋到自己點解會做某啲行為、有某啲想法。除咗可以欣賞多啲自己嘅獨特性之外，亦都幫助咗我理解其他人嘅思維模式。或許就係寄情於理嘅概念？尤其是最近研究socionics嘅時候，發現每個人都可以發揮自己與生俱來嘅長處，喺社會上產生作用，就令我覺得好有啟發性。所以希望大家唔好用人格學作為唔改善自我嘅藉口，或者係幫人貼標籤，而係要好好咁了解自己、了解他人，然後再進步呀~ 今次就講到呢度先，多謝大家，下次見