男朋友不育想我呃屋企扮係我自己不育然後第時做試管嬰兒
匿名
(小小背景 今年2X大學yr4 讀專科， 出到嚟份工應該做一陣可以好快去到三四萬幾可。男朋友大我幾年， 出咗社會2x尾， 返緊飲食業part time 都有五位數嘅， 同佢拍咗幾年拖講定咗未來結婚嘅階段，見曬屋企人。 )
之前男朋友body check，發現原來可能因為成日吸煙嗜酒定點佢係好難有BB，精子有問題咁，算不育，佢屋企人唔知件事。
然後佢講咗畀我知希望我保守秘密， 扮係我唔生得不孕先，未來照結婚！因為佢好驚我哋畀人拆曬，話我屋企人有啲拜金睇唔起佢月入一萬幾，知道咗一定逼我地分手 。 ( 唔係拜金，因為之前主要啲洗費都係我畀好少AA， 我爸爸媽媽誤會佢食緊軟飯， 叫佢離開我。)
有一日，我問佢如果第時畀人問點解幾年都冇小朋友點算呀， 佢話叫我扮住係我自己「唔生得」先，因為男人唔生得精子有病好冇面， 而且咁樣佢就可以畀少少禮金早幾年結婚 。我聽到佢叫我呃父母話自己不孕嗰下，覺得好離譜，個心好似畀人割咗一下咁，叫分手，係我屋企附近當眾又喊又跪地求我話佢好愛我吾好吾要佢啦， 如果唔原諒佢就唔企返起身咁， 我冇辦法唯有唔分。
點知佢有個好friend嘅女性朋友IG direct 話我恃住屋企有臭錢好物質拜金，明知男朋友家境差係都唔肯為佢做場戲(我真係冇)， 話我好自私，逼一個大男人求個女人仔，話如果係佢嘅話佢一定可以做。 我聽後好唔開心喊。
然後前排再傾，佢話佢屋企人其實好想要小朋友，佢問我如果時間合適嘅話要唔要做試管呀， 佢話「最多第時結婚你辭咗份工 搬過嚟同我屋企人住，幸幸福福咁喺屋企湊仔，我養你一世」， 但我聽到淨係覺得好唔現實， 佢份工而家應該淨係去到兩萬。 我問佢使咁啲錢邊度嚟跟住佢話叫我到時呃完父母我唔生得之後，就再問阿爸阿媽拎錢話係治我不育嘅醫藥費， 佢畀少少錢同我夾咁。
而且我再查資料， 試管都幾貴下， 又食藥又卵，女仔一生只會排出約400個卵， 食藥加速加多佢排出嘅數目傷害係不可逆。 同埋要將有啲冷冰冰嘅儀器將陌生人三唔識七既精子打入去，我心理同身體真係有啲接受唔到……
然後前嗰排嗌交嗌得好勁，佢話佢為咗我，已經咁大方戴綠帽，唔介意我做試管有其他人BB， 我憑咩唔可以為咗佢咁樣付出啊。
我聽落真係覺得好心噏， 我唔想呃爸爸媽媽或者佢屋企人， 亦都冇咁樣嘅心理準備，都唔知而家個婚結唔結好… 係咪我真係好自私呢
