相信過去一年一定係地獄黎。尤其是你有好多自責，會令你覺得係自己個人有問題，所以就更抑鬱。 但要明白，呢個世界好多人同你好唔同。其實有好多人，將善良當成籠絡別人的手段，去為自己謀私利/達成自己的目的(即係將善良只當成手段)的人，而唔係好似你咁，希望導人向善，令細路可做一個善良有愛既人(即係將善良當成人生終旨/目標)。呢一類視善良為手段既人，通常都係好自我，唔會明白人地諗咩，覺得自己大曬，佢地覺得自己既努力得唔到認同，覺得呢個世界欠左佢，睇野好自然都會厭世，仲邊會可能對人有愛? 再加上佢地係一個自以為「差」既環境，覺得無安全感，所以亦都好自然要透過劃小圈子，搵一班「忠心」既o靚，好似太監咁事事附和自己，搵返d安全感，然後就劃一個共同敵人去打稻草人，去令到自我感覺係有返d地位，就好似自己仲係名校，行出黎都仲係有果種優越感咁。有D人接受唔到環境改變，就會搵好多方法去攞返佢覺得應該有既優越感。只不過因為佢地社交技巧強，好識包裝自己，做得不留痕跡，例如扮可憐去搏同情，用大話去搏取別人信任等等，所以，先會令一班人本身中立(甚或我會覺得係愚蠢，只懂人云亦云)既人企係佢果邊，令你有一種錯覺係覺得自己有問題。 的確一隻手掌拍唔響，可能你都有錯，但對方連最基本既尊重都無就已經係錯，所以無需自責。另外可能你心底仲有一絲希望人地會諒解你，同你和好如初，總希望透過人地既認同，去證明返自己我係無問題。但請記住，討好呢類人，感覺就有d似人地想一腳伸開你，你仲要抱住佢隻腳去奶去鞋底咁，不但唔會有你想要既結果，而且仲進一步令你處於劣勢。 所以要認清自己現處於劣勢，你只求生存。正如你在森林遇到蠍子，你唔俾人咬死已經係萬幸，你難道仲要計較自己係咪太無吸引力，所以令蠍子都唔想理你? 所以，人地唔同你日日柴娃娃。甚或唔睬你，唔係代表你被孤立，而係俾機會你可以唔受佢地影響自己情緒，令自己可專注返學業，可以以正常情緒狀態出Placement, 甚至做其他相關兼職等等，以確保剩底既日子，唔係混混噩噩，而係可以真正裝備好自己，係畢業果刻，係真係準備好做一個真係有料既老師去教人。 而非常時期也一定要用非常方法。因此都建議你私底下同系主任講(1)你宜家既情況(被欺凌)，(2)你既要求(可以係希望佢地處分d同學, 又或者如果佢地想冷處理，你就希望佢地俾你d project可以自己一組, 視乎情況而定)，內容簡潔而清晰，令人地一聽就覺得好有畫面，感覺到你好無助(所以講之前，都要寫張紙舖排/整理一下點先達到呢個效果)。而要求亦要清楚而易明白，而且時間要快，確保人地唔會捷足先登話左你先。 通常呢d咁識玩(即係對professor扮好學生，對善良既人就蝦蝦霸霸)既欺凌者係怕得罪Professor，而令自己無運行。所以，如果你將件事上到去Professor既層面，佢地都怕俾Professor對自己印象差，而唔敢做得咁盡。 另外，當去到一D過火位既時候，記住要反抗，唔好怕事。你要停止人地既行為，可以係(1)俾人知道你繼續咁傷害我都無用, 或者係(2)發生一d事嚇親佢，甚至如果同你糾纏會破壞自己形象。所以，當(1)無效既時候，就可能要用(2)。當Professor知道你被欺凌既背景後，你將同佢地既對立白熱化，一部份Professor都會明白你係有苦衷/被迫反抗，有一部份可能就因為覺得要追蹤來龍去脈實在太煩，又唔相偏幫一邊俾人話，所以選擇冷處理件事。咁就有空間俾你發大黎搞，嚇到對方知道搞你會有麻煩，而選擇停手。經驗之談係好大部份欺凌者都欺善怕惡，若你有返個勢係度，識反抗，已經會嚇親而選擇停手。 唔知你有冇睇過松隆子套「告白」，當個個人都指責同學A有愛滋，有個仲打佢一身，同學A就選擇野界花自己塊面，用D血去掂落欺凌者既身到。讓他可以驚下自己有愛滋。佢反應冷靜而迅速，又無真係令自己捲入暴力行為裡面，但又俾人感受到有反抗的意味。所以都睇到，反抗有時唔代表要真係打佢一身，反而係要攻其弱點，插眼鎖喉，令佢有一刻覺得驚，知道再搞落去就會死先得。 當你停止到佢地既行為後，就要好好處理情緒問題; 到狀態好D，就參加唔同學會，識多D唔同既朋友，有多D人同自己傾下計玩下; 暑假既時候去接下D學校功輔班黎教，堵加自己教學經驗; 實習果時多同Mentor傾下計，吸收下課室管理經驗等等，務求用充實既活動好好過剩底既3年，令你走既時候唔會後悔。 想講既係，日後無論去到學校班老師，都會有好多呢類黑心既人不斷搞風搞雨，老師圈子內都會有好多呢D是非。甚或係學生本身都可能會遇到呢d問題向你求救。而老師面對好多行政/人事問題，本身已經心力交瘁，再面對校園欺凌問題，好多都怕越搞越大，從而影響校譽甚或得罪其他學生而令自己增添無謂工作，所以會選擇冷處理。但無人知道咁做會對被欺凌者既傷害有幾大。 所以掉返轉講，如果你無經歷過呢d黑暗野，又點會明白經驗呢D野既學生有幾痛苦? 而會選擇為學生出頭，甚或有經驗教返能力弱既學生點面對? 又或者，如果你遇到黑暗時，你選擇退縮，咁又點可以做到一個榜樣，以身教話俾學生知要勇敢面對先得? 要有唔怕死既決心，先會有能力保護呢D能力弱既學生。亦都會令自己有勇氣為呢D學生爭取佢地應得既野，令佢大個知道要做返同樣既事保護其他類似既人。呢個係老師其中一個職責。我會覺得，呢D經歷，就好似西遊記入面既給你三粒痣既人，正正話緊俾你聽你有重要使命要做 - 而係做一個有勇氣，有承擔，真係會為學生好的好老師。 到到真係入課室教書果時，學生係好鐘意聽故仔的(那當然是要同你講緊既主題相關)，所以多一點經歷(那怕是苦或甜味，對日後的教學其實有幫助。希望幫到你。