然後有好多身在福中不知福嘅人就會覺得只係基層小朋友唔肯努力 😂 你補緊習嘅時候，好多基層就只可以靠自己。你可以去旅行擴闊眼界嘅時候，好多基層就只可以留喺屋企。你有錢去社交嘅時候，好多基層就為慳錢可免則免。好多人有自己私人空間嘅時候，好多基層就只可以喺廳到讀書休息。好多人有錢去學呢樣嗰樣嘅時候，好多基層只可以自學，但自學都未必有適合嘅地方同器材。 一個人嘅能力同佢嘅家境、成長經歷同環境係好有關係，補習有人引領指導比較容易事半功倍，旅行可以吸收到好多文化歷史價值觀世界觀，社交可以鍛鍊到溝通同解難能力，私人空間可以提升專注力同學習能力，課外活動可以學到唔同技能，呢啲全部都影響一個人成長之後嘅能力。 個環境都好影響一個人嘅精神同自信，長期都精神差低自信，細細個喺發展最重要嘅時候就承受咁多野，當然有人會跑出，但家家有本難念的經，每個人先天嘅資質又唔同，可以跑出嘅又有幾個？更何況今時今日呢個環境，有能力嘅人要突圍而出都難，更何況係基層長大嘅人呢⋯ 利申：自身經歷 + 讀相關科目