真，住私樓學生同我講佢由K3開始就有請私補每日補習，佢媽媽係我嗰科第一屆畢業生，有讀master，爸爸都係三大grad，佢有唔識一問人就有解答，所以一直以來學習進度都好快，唔會一個concept教極唔明。其他中產學生同佢都差唔多，只係未到K3開始補咁誇張。都有公屋學生好聰明，爸爸媽媽雖然學歷唔高但好捨得洗錢供小朋友讀書，由英文幼稚園讀到國際學校，佢自己都好爭氣。但平均嚟講，公屋學生資質真係會差少少，有時唔係佢哋唔想學，係屋企隔音差，隔離屋同樓下不斷有噪音，好多時仲有其他親戚一齊住，補緊習都喺度大聲播歌睇抖音。就算請補習，好多考慮嘅唔係老師識唔識教而係收費平唔平，但補高中electives出$120/hr招到嘅老師會有幾多心機教就存疑啦。加上屋企人忙，冇精力照顧，就俾部iPad小朋友睇各種shorts，小朋友開口埋口都係抖音嘢，想讀好都難啦。 我自己都係公屋出身，以上問題我屋企都多少有，不過我係放養，由細到大冇去過興趣班同補習，屋企人冇俾壓力我，純靠自己努力，即使DSE考得唔高唔低叫做過得去，但始終有啲自卑自己咩才藝都冇，生活費都係自己俾。我已經算好彩，起碼成績夠接私補，但揀科永遠唔會揀興趣，一定係睇前途。其實我一啲都唔鍾意讀緊嘅科，但我屋企冇條件俾我讀所謂嘅乞食興趣科⋯